കൊച്ചി; സംസ്ഥാനത്ത് പക്ഷിപ്പനി സ്ഥിരീകരിച്ചിരിക്കുകയാണ്. ഈ സാഹചര്യത്തില് നിര്ദേശങ്ങള് നല്കിയിരിക്കുകയാണ് മൃഗസംരക്ഷണ വകുപ്പ്. നന്നായി പാകം ചെയ്ത മുട്ട, കോഴിയിറച്ചി എന്നിവ ഭക്ഷ്യ യോഗ്യമാണെന്ന് മൃഗസംരക്ഷണ വകുപ്പ് അറിയിച്ചു.
അതേസമയം, ബുള്സ് ഐ പോലുള്ള പകുതി വേവിച്ച മുട്ടയും പകുതി വേവിച്ച മാസവും ഒഴിവാക്കണമെന്നും നിര്ദേശിച്ചു. നിലവിലെ സാഹചര്യത്തില് ആശങ്കപ്പെടേണ്ടതില്ലെന്ന് വ്യക്തമാക്കിയിട്ടുണ്ട്. പാകം ചെയ്യുന്നതിനായി പച്ചമാംസം കൈകാര്യം ചെയ്ത ശേഷം കൈകള് സോപ്പ് ഉപയോഗിച്ച് കഴുകണം.
പക്ഷിപ്പനി നിയന്ത്രണ വിധേയമാണെന്നും ആശങ്കപ്പെടാനില്ലെന്നുമാണ് പറയുന്നത്. പക്ഷികളെ ബാധിക്കുന്ന വൈറല് രോഗമായ പക്ഷിപ്പനി ചില പ്രത്യേക സാഹചര്യങ്ങളില് മനുഷ്യരിലേക്ക് പകരാം. തണുത്ത കാലാവസ്ഥയില് മാസങ്ങളോളം ജീവിക്കാന് കഴിവുള്ള വൈറസ് 60 ഡിഗ്രി ചൂടില് അര മണിക്കൂറില് നശിച്ചു പോകും.
ചത്തതോ, രോഗം ബാധിച്ചതോ ആയ പക്ഷികളെയോ, ദേശാടന കിളികളെയോ പക്ഷി കാഷ്ഠമോ നേരിട്ട് കൈകാര്യം ചെയ്യാതെ കൈയുറയും മാസ്കും ഉപയോഗിക്കുകയും ചൂടുവെള്ളവും സോപ്പും ഉപയോഗിച്ച് കൈകള് കഴുകി വൃത്തിയാക്കുകയും ചെയ്യണം.
രോഗം സ്ഥിരീകരിച്ച പ്രദേശത്തിന്റെ ഒരു കിലോമീറ്റര് ചുറ്റളവിലുള്ള മുഴുവന് പക്ഷികളെയും കൊന്ന് മറവ് ചെയ്യുന്നതടക്കമുള്ള എല്ലാ കരുതല് നടപടികളും വകുപ്പ് സ്വീകരിച്ചിട്ടുണ്ട്.