കൊച്ചി; കേരളത്തില് ഇന്നുമുതല് കോവിഡ് നിയന്ത്രണങ്ങളില് ഇളവുകള്. ബീച്ചുകള് ഉള്പ്പടെയുള്ള തുറസ്സായ വിനോദ സഞ്ചാര കേന്ദ്രങ്ങള് ഇന്നുമുതല് തുറക്കും. ബാങ്കുകള്, വ്യാപാര-വ്യവസായ സ്ഥാപനങ്ങള്ക്ക് ആറു ദിവസം പ്രവര്ത്തിക്കാനും അനുമതിയുണ്ട്. ഓണക്കാലത്തോടനുബന്ധിച്ചാണ് കൂടുതല് ഇളവുകള് അനുവദിച്ചത്.
ആഴ്ചയില് 5 ദിവസവും സര്ക്കാര് ഓഫിസുകള് തുറക്കാം. ഒരു ഡോസ് വാക്സീനെടുത്തവര്ക്ക് ടൂറിസം കേന്ദ്രങ്ങളില് പ്രവേശിക്കാന് തടസമില്ലെന്ന് സര്ക്കാര് അറിയിച്ചു. ഇന്നു കടകള് തുറന്നാല് 28 വരെ വിപണി സജീവമായിരിക്കും. രാവിലെ 7 മുതല് രാത്രി 9വരെ കടകള്ക്ക് പ്രവര്ത്തിക്കാം.
കടകളില് പ്രവേശിക്കാന് നിബന്ധനകളുണ്ടെങ്കിലും ജനങ്ങളെ ബുദ്ധിമുട്ടിക്കേണ്ടെന്ന നിര്ദേശമുള്ളതു വ്യാപാരമേഖലയ്ക്കു കൂടുതല് ഉണര്വ്വ് പകരും. എസി ഇല്ലാത്ത റെസ്റ്റോറന്റുകളില്, ഇരുന്നു കഴിക്കാനുള്ള അനുമതി താമസിക്കാതെ നല്കുമെന്നു സര്ക്കാര് വൃത്തങ്ങള് സൂചന നല്കി.
മാളുകളില് സാമൂഹികഅകലം പാലിച്ച്, ബുധനാഴ്ച മുതല് ജനങ്ങള്ക്ക് പ്രവേശിക്കാം. ടൂറിസം മേഖലയും തിങ്കളാഴ്ച മുതല് പൂര്ണമായും തുറക്കുകയാണ്. വാക്സീനെടുത്തവര്ക്ക് ഹോട്ടലുകളില് താമസിക്കുന്നതിന് തടസമില്ല.