മലയാളത്തിന്റെ യുവ നടൻ ഉണ്ണി മുകുന്ദനും ആത്മീയയും പ്രധാനവേഷങ്ങളിലെത്തുന്ന പുതിയ ചിത്രത്തിലേക്ക് അഭിനേതാക്കളെ ക്ഷണിച്ചുകൊണ്ട് വ്യാജസന്ദേശം പ്രചരിക്കുന്നു. സ്കൂൾ കഥയാണ് ചിത്രത്തിന്റെ പ്രമേയമെന്നും പ്രധാന കഥാപാത്രങ്ങൾ കൈകാര്യം ചെയ്യുന്ന കുട്ടികളെയാണ് ആവശ്യമെന്നുമാണ് പറയുന്നത്.
‘ഉണ്ണി മുകുന്ദൻ ആത്മീയ ജോഡിയുടെ ചിത്രീകരണം തുടങ്ങാൻ ഇരിക്കുന്ന ചിത്രത്തിലേക്ക് പുതുമുഖങ്ങളെ തേടുന്നു. കുട്ടികൾക്കും അവസരം ഉണ്ടു ..ഇടുക്കി ലോക്കേഷൻ..വാട്ട്സ്ആപ് 8943316392’, എന്നാണ് വ്യാജ സന്ദേശം.
നമ്പറിൽ ബന്ധപ്പെട്ടാൽ രാജേഷ് എന്നു പരിചയപ്പെടുത്തുന്ന ആളാണ് ഫോൺ എടുക്കുന്നത്. ചന്ദ്രൻ എന്നയാൾ സംവിധാനം ചെയ്യുന്ന സിനിമയിലേക്കാണ് ക്ഷണം എന്നാണ് ഇയാൾ അറിയിക്കുന്നത്.
ലോക്ക്ഡൗൺ നിയന്ത്രണങ്ങൾ ഉള്ളതിനാൽ ഓഡിഷൻ പിന്നീട് നടത്തുമെന്നാണ് ഇവർ പറയുന്നത്.
കണ്ണൂരിൽ വച്ചാണ് ഓഡിഷൻ നടക്കുക എന്നും അറിയിക്കുന്നു. എന്നാൽ സന്ദേശം വ്യാജമാണെന്നാണ് ഉണ്ണി മുകുന്ദന്റെ അടുത്ത വൃത്തങ്ങൾ അറിയിച്ചത്.