ചേർത്തല: ഓമനക്കുട്ടനിലെ സഖാവിനെ പ്രളയകാലത്തെ വ്യാജ വാർത്തയൊന്നും ഉലച്ചിട്ടില്ല. ചേർത്തലയിലെ സിപിഐ എം പ്രവർത്തകനായ ഓമനക്കുട്ടൻ കൊറോണ കാലത്തും സന്നദ്ധപ്രവർത്തനത്തിലാണ്. സ്വന്തം കൃഷിയിടത്തിൽ വിളഞ്ഞ പച്ചക്കറി ജനകീയ അടുക്കളയിലേക്ക് സംഭാവന നൽകി മാതൃകയാകുകയാണ് ഈ പാർട്ടി ലോക്കൽ കമ്മിറ്റി അംഗം. ചേർത്തല തെക്ക് പഞ്ചായത്തിലെ കണ്ണികാട് പ്രദേശത്താണ് ഓമനക്കുട്ടനും കുടുംബവും താമസിക്കുന്നത്.
കണിച്ചുകുളങ്ങരയിൽ കെ കെ കുമാരൻ പെയിൻ ആൻഡ് പാലിയേറ്റീവ് കെയർ സൊസൈറ്റി തുറന്ന ജനകീയ അടുക്കളയിലേക്കാണ് ഓമനക്കുട്ടൻ പച്ചക്കറികൾ സംഭാവന ചെയ്തത്. ഈ അടുക്കള നടത്തിപ്പിലും ഓമനക്കുട്ടൻ സജീവമായുണ്ട്. കറുപ്പൻകുളങ്ങര ലോക്കൽ കമ്മിറ്റിയംഗമാണ് സഖാവ്.
കൽപ്പണിയോടൊപ്പമാണ് ഓമനക്കുട്ടന്റെ കൃഷി. അച്ഛൻ പരേതനായ സുകുമാരൻ മികച്ച പച്ചക്കറി കർഷകനും കൃഷി വകുപ്പ് ജീവനക്കാരനുമായിരുന്നു. നെൽകൃഷിക്ക് ശേഷം പാടങ്ങളിലാണ് ഈ മേഖലയിലെ പച്ചക്കറികൃഷി. ഈ പാടത്തുവിളഞ്ഞ കുമ്പളങ്ങയും ചീരയും മറ്റമാണ് ഓമനക്കുട്ടൻ സംഭാവന നൽകിയത്.
കഴിഞ്ഞപ്രളയകാലത്ത് ദുരിതാശ്വാസക്യാമ്പിൽ അരിയെത്തിക്കാൻ പ്രവർത്തിക്കുന്നതിനിടയിലാണ് ചാനലുകളിൽ ഓമനക്കുട്ടനെ പ്രതിനായകനാക്കി വ്യാജ വാർത്ത വന്നത്. സിപിഐ എം നേതാവായ ഓമനക്കുട്ടൻ ദുരിതാശ്വാസക്യാമ്പിൽ പണപ്പിരിവ് നടത്തുന്നു എന്നായിരുന്നു വാർത്ത.ഒരു ആർഎസ്എസ് പ്രവർത്തകൻ പകര്ത്തിക്കൊടുത്ത വീഡിയോ ഉപയോഗിച്ചായിരുന്നു മുഖ്യ ചാനലുകളിൽ പ്രചരണം.
ക്യാമ്പിലെ അരി തീർന്നപ്പോൾ ഓമനക്കുട്ടൻ പോയി അരി വാങ്ങിക്കൊണ്ടുവന്നു. അദ്ദേഹവും ആ ക്യാമ്പംഗമായിരുന്നു. അദ്ദേഹത്തിന്റെ കയ്യിൽ ഓട്ടോക്കൂലി കൊടുക്കാനുള്ള പണം ഉണ്ടായിരുന്നില്ല. ഓട്ടോക്കാരനെ പറഞ്ഞുവിടാൻ കുറച്ചു രൂപ ക്യാമ്പംഗങ്ങളിൽ നിന്നും പിരിച്ചു. ഇതാണ് വ്യാജവാർത്തയായത്. വാർത്ത പൊളിഞ്ഞപ്പോൾ ചാനലുകൾ പിന്നീട് മാപ്പുപറഞ്ഞു.സംസ്ഥാന സർക്കാരിനുവേണ്ടി പ്രിൻസിപ്പൽ സെക്രട്ടറി ഡോ വി വേണുവും ഓമനക്കുട്ടനോട് മാപ്പ് ചോദിച്ചു.