അഹമ്മദാബാദ്: പ്രധാന മന്ത്രി നരേന്ദ്ര മോഡിയെ പുകഴ്ത്തി അമേരിക്കന് പ്രസിഡന്റ് ഡോണാള്ഡ് ട്രംപ്. കഠിനാധ്വാനത്തിന്റെയും സമര്പ്പണത്തിന്റെയും ജീവിക്കുന്ന തെളിവാണ് മോഡിയെന്നാണ് ഡോണാള്ഡ് ട്രംപിന്റെ പുകഴ്ത്തല്. മൊട്ടേര സ്റ്റേഡിയത്തില് നമസ്തേ ട്രംപ് പരിപാടിയില് സംസാരിക്കവേയായിരുന്നു ട്രംപിന്റെ പ്രശംസ.
പ്രധാനമന്ത്രി മോഡി ഒരു ചായ് വാല ആയാണ് ജീവിതം തുടങ്ങിയത്. അദ്ദേഹം ചായക്കാരനായി ജോലി ചെയ്തു. ഇന്ന് എല്ലാവരും അദ്ദേഹത്തെ സ്നേഹിക്കുന്നു. എന്നാല് ഞാന് ഒന്നു പറയാം, അദ്ദേഹം ശരിക്കും കടുപ്പക്കാരനാണ്. മോഡി ഗുജറാത്തിന്റെ മാത്രം അഭിമാനമല്ലെന്നും ട്രംപ് പറഞ്ഞു. പ്രധാനമന്ത്രി അവിശ്വസനീയമായ ഒരു ഉയര്ച്ചയുടെ ചലിക്കുന്ന കഥയാണ്. കഠിനാധ്വാനം, സമര്പ്പണം എന്നിവയുടെ ജീവിക്കുന്ന തെളിവാണ് താങ്കളെന്നും – ട്രംപ് കൂട്ടിച്ചേര്ത്തു.
അമേരിക്ക ഇന്ത്യയെ സ്നേഹിക്കുകയും ബഹുമാനിക്കുകയും ചെയ്യുന്നുവെന്നും ട്രംപ് പറഞ്ഞു. ഇന്ത്യന് ജനതയ്ക്ക് അമേരിക്ക എക്കാലത്തും വിശ്വാസ്യതയുള്ള സുഹൃത്തായിരിക്കുമെന്നും ട്രംപ് പറഞ്ഞു. നമസ്തേ പറഞ്ഞുകൊണ്ടായിരുന്നു ട്രംപ് പ്രസംഗം ആരംഭിച്ചത്. ”അഞ്ചു മാസം മുമ്പ് നിങ്ങളുടെ മഹാനായ പ്രധാനമന്ത്രിയെ ടെക്സസിലെ ഫുട്ബോള് സ്റ്റേഡിയത്തില് അമേരിക്ക സ്വാഗതം ചെയ്തു. ഇന്ന് ലോകത്തെ ഏറ്റവും വലിയ ക്രിക്കറ്റ് സ്റ്റേഡിയത്തില് നിങ്ങള് ഞങ്ങളെ സ്വാഗതം ചെയ്യുന്നു. ഈ ആതിഥ്യ മര്യാദ ഞങ്ങള് എന്നും ഓര്ക്കും. ഇന്ത്യ ഇന്നു ഞങ്ങളുടെ ഹൃദയത്തില് പ്രത്യേക ഇടം പിടിച്ചിരിക്കുന്നുവെന്നും ട്രംപ് പറഞ്ഞു. ഒരു ലക്ഷത്തിലേറെ പേര് തിങ്ങി നിറഞ്ഞ സ്റ്റേഡിയത്തിലാണ് നമസ്തേ ട്രംപ് പരിപാടി നടന്നത്.