മലയാളികള് നെഞ്ചോട് ചേര്ത്ത ഗാനമാണ് ഉഷാ ഉതുപ്പിന്റെ എന്റെ കേരളം എത്ര സുന്ദരം എന്ന് തുടങ്ങുന്ന പാട്ട്. എന്നാല് ഇന്ന് ആ പാട്ട് പാടാനുള്ള മാനസികാവസ്ഥയിലല്ല മലയാളികള്.
അതുകൊണ്ടു തന്നെ മലയാളികളുടെ പ്രിയപ്പെട്ട ദീദി ‘എന്റെ കേരളം എത്ര സുന്ദരം’ എന്ന പാട്ടൊന്ന് മാറ്റി പാടിയിരിക്കുകയാണ്.
‘എന്റെ കേരളം എത്ര സുന്ദരം’ എന്ന വരികള്ക്കു പകരം ‘എന്റെ കേരളം എത്ര സങ്കടം’ എന്നാണ് മാറ്റിയ വരികള്. പ്രളയക്കെടുതിയില് ദുരിതമനുഭവിക്കുന്ന കേരളത്തിന്റെ ദുഖത്തില് പങ്കുചേരുകയാണ് പുതിയ ഗാനത്തിലൂടെ ഉഷ ഉതുപ്പ്. ഹരിതാഭവും ആരോഗ്യപൂര്ണവുമായ കേരളത്തിന്റെ നല്ലനാളേയ്ക്കുള്ള ഒരു പ്രാര്ഥനയാണ് ഇത് എന്ന കുറിപ്പോടെയാണ് വിഡിയോ പങ്കുവച്ചത്.
പ്രളയത്തിന്റെ തീവ്രത പ്രകടമാക്കുന്ന രംഗങ്ങള് കോര്ത്തിണക്കിയാണ് വിഡിയോ. ‘പ്രളയതാളം’ എന്നാണ് ആല്ബത്തിന്റെ പേര്. ചിറ്റൂര് ഗോപിയുടെ വരികള്ക്കു സുമിത് രാമചന്ദ്രനാണു സംഗീതം.
കൊച്ചിയുടെ അവസ്ഥകണ്ട് എനിക്ക് സങ്കടമായി. ഇത്ര ദൂരെ ഇരുന്ന് കേരളത്തിനായി നമുക്ക് എന്തു ചെയ്യാന് കഴിയുമെന്നു ഞാന് മകള് അഞ്ജലിയോടു ചോദിച്ചു. കണ്ണുനീര് ഒന്നിനും പരിഹാരമാകില്ല. കരയാതെ ചിറ്റൂര് ഗോപിയെ വിളിച്ച് ‘എന്റെ കേരളം’ എന്ന ഗാനത്തിന്റെ വരികള് കേരളത്തിന്റെ ഇപ്പോഴത്തെ അവസ്ഥക്കനുസരിച്ച് മാറ്റി എഴുതാമോ എന്നു ചോദിക്കണമെന്നും അവള് എന്നോടു പറഞ്ഞു. അതുപ്രകാരം ഞാന് അദ്ദേഹത്തെ വിളിച്ചു. അങ്ങനെയാണു ഈ ഗാനം പിറന്നത്.
കേരളത്തോടുള്ള ആദരസുചകമായി ഈ ഗാനം സമര്പ്പിക്കുന്നുവെന്ന് ഉഷ ഉതുപ്പ് പറയുന്നു.