ചെന്നൈ: മകന് വിഷം നല്കി കൊന്ന ശേഷം അമ്മ ജീവനൊടുക്കി. ചെന്നൈയിലാണ് നടുക്കുന്ന സംഭവം. മലയാളികളായ അമ്പത്തൂര് രാമസ്വാമി സ്കൂള് റോഡില് ലത (38) യും മകന് തവജും (14) ആണ് മരിച്ചത്. സാമ്പത്തിക പ്രയാസത്തെത്തുടര്ന്നാണ് ലത മകന് വിഷംനല്കി ജീവനൊടുക്കിയത്.
കണ്ണൂര് സ്വദേശിനിയാണ് ലത. ചൊവ്വാഴ്ചയാണ് സംഭവം. അമ്മയെ അബോധാവസ്ഥയില് കണ്ട തവജ് ചൊവ്വാഴ്ച രാവിലെ അയല്വാസിയെ വിവരമറിയിക്കുകയായിരുന്നു. അവര് വന്നുനോക്കിയപ്പോള് ലതയെ മരിച്ചനിലയില് കണ്ടെത്തി. ഇതിനിടയില് തവജും അബോധാവസ്ഥയിലായി.
also read: ഈ ആനവണ്ടിയില് ഇനി കുട്ടികള് പഠിക്കും, ക്ലാസ്മുറിയാവാന് ഒരുങ്ങി കെഎസ്ആര്ടിസി ബസ്
ഉടന് തന്നെ ആശുപത്രിയിലെത്തിച്ചെങ്കിലും ജിവന് രക്ഷിക്കാനായില്ല. സാമ്പത്തിക ഞെരുക്കം കാരണം ഇവര് ഭക്ഷണത്തിനുപോലും ഏറെ പ്രയാസപ്പെട്ടിരുന്നതായി പരിസരവാസികള് പറയുന്നു. 15 വര്ഷംമുമ്പാണ് ഭരദ്വാജ് എന്നയാളുമായി ലത വിവാഹിതയാകുന്നത്.
നാലുവര്ഷം മുമ്പ് ബന്ധം വേര്പെടുത്തി. അതിനുശേഷം ലത മകനുമൊത്ത് തനിച്ചു താമസിക്കുകയായിരുന്നു. തവജ് അമ്പത്തൂരില് സ്വകാര്യ സ്കൂളിലെ പത്താംക്ലാസ് വിദ്യാര്ഥിയാണ്. മൃതദേഹം പോസ്റ്റുമോര്ട്ടത്തിനായി കില്പ്പോക്ക് സര്ക്കാര് മെഡിക്കല് കോളേജ് ആശുപത്രിയിലേക്ക് മാറ്റി. സംഭവത്തില് അമ്പത്തൂര് പോലീസ് കേസെടുത്തു.