തിരുവനന്തപുരം: കേന്ദ്രസര്ക്കാരിന്റെ കാര്ഷിക നിയമത്തിനെതിരായ പ്രമേയത്തെ അനുകൂലിച്ച് വോട്ട് ചെയ്ത ബിജെപി എംഎല്എ ഒ രാജഗേപാലിനെതിരെ വിമര്ശനം ഉയരുകയാണ്. രാജഗോപാലിന്റെ നടപടിയില് കേന്ദ്ര നേതൃത്വം അതൃപ്തി അറിയിച്ചു.
ഇത് സംബന്ധിച്ച് ഒ രാജഗോപാല് ബിജെപി സംസ്ഥാന അധ്യക്ഷന് കെ സുരേന്ദ്രനുമായി കൂടികാഴ്ച്ച നടത്തി. രാജഗോപാലിന്റെ നിലപാട് പാര്ട്ടിയെ പ്രതിരോധത്തിലാക്കിയെന്ന പൊതുവികാരമാണ് ബിജെപി സംസ്ഥാന നേതൃത്വത്തിനുള്ളത്. എന്നാല് അദ്ദേഹത്തിനെതിരെ കടുത്ത നടപടിയിലേക്ക് പോകേണ്ടതില്ലായെന്നാണ് തീരുമാനം.
അതേസമയം സ്പീക്കര് വോട്ടെടുപ്പ് ആവശ്യപ്പെട്ടിട്ടില്ലെന്നാണ് രാജഗോപാലിന്റെ വിശദീകരണം. ഒ രാജഗോപാല് പ്രമേയത്തെ അനുകൂലിച്ചതിന് പിന്നാലെ ബിജെപി നേതൃത്വം വെട്ടിലാവുകയായിരുന്നു. ഇന്നലെ ചേര്ന്ന പ്രത്യേകം നിയമസഭാ സമ്മേളനത്തില് ആയിരുന്നു കാര്ഷിക നിയമത്തിനെതിരായ പ്രമേയം ശബ്ദവോട്ടോടെ പാസാക്കിയത്.
രാജഗോപാല് പ്രമേയത്തെ എതിര്ത്ത് സംസാരിച്ചെങ്കിലും വോട്ടെടുപ്പില് എതിര്ത്തിരുന്നില്ല. പൊതുജന അഭിപ്രായം മാനിച്ചാണ് പ്രമേയത്തെ എതിര്ക്കാതിരുന്നതെന്നായിരുന്നു നിയമസഭയില് നിന്ന് പുറത്തിറങ്ങിയ ശേഷം വിളിച്ചുചേര്ത്ത വാര്ത്താസമ്മേളനത്തില് രാജഗോപാല് പറഞ്ഞത്.
കേരളത്തിന് ഒരൊറ്റ അഭിപ്രായമാണെന്ന് പുറത്തുവരട്ടെ. ഉന്നത ജനാധിപത്യ സ്പിരിറ്റ് വെച്ചാണ് ഞാന് പ്രമേയത്തെ എതിര്ക്കാതിരുന്നത്. നമുക്കിടയില് ഇക്കാര്യത്തില് എതിരഭിപ്രായങ്ങളുണ്ടെന്ന് പുറത്തറിയേണ്ടതില്ലല്ലോയെന്നുമായിരുന്നു ഒ രാജഗോപാലിന്റെ പ്രതികരണം.
കേന്ദ്രത്തില് ബിജെപി സര്ക്കാര് കൊണ്ടുവന്ന നിയമത്തിനെതിരായ പ്രമേയത്തെ എതിര്ക്കാതിരിക്കുന്നതിന്റെ സാംഗത്യം മാധ്യമങ്ങള് ആരാഞ്ഞപ്പോള് ഇത് ജനാധിപത്യ സ്പിരിറ്റ് ഉയര്ത്തിപ്പിടിക്കാനാണെന്നായിരുന്നു മറുപടി. നേരത്തെ നിയമസഭയില് കേന്ദ്ര കാര്ഷിക നിയമങ്ങള്ക്കെതിരായ പ്രമേയത്തെ രാജഗോപാല് പ്രസംഗത്തില് എതിര്ത്തിരുന്നു.
പ്രമേയം അനാവശ്യമാണെന്നും പുതിയ നിയമങ്ങള് കര്ഷകര്ക്ക് അനുകൂലമാണെന്നും കേരള നിയമസഭയിലെ ഏക ബിജെപി എംഎല്എ പറയുകയുണ്ടായി. എന്നാല് വോട്ടെടുപ്പ് ഘട്ടത്തില് രാജഗോപാല് പ്രമേയത്തെ എതിര്ത്തില്ല. ഇതിന് പുറമേയാണ് നിയമസഭയ്ക്ക് അകത്ത് വാര്ത്താസമ്മേളനം നടത്തി തന്റെ നിലപാട് വിശദീകരിച്ചത്.