നേന്ത്രപ്പഴം ഉപയോഗിച്ച് ഉണ്ടാക്കാവുന്ന സ്വാദിഷ്ഠമായ ഹല്വയാണ് ബനാന ഹല്വ. നല്ല പഴുത്ത നേന്ത്രപ്പഴം കിട്ടിയാല് ഇനി ഇതൊന്ന് പരീക്ഷിക്കാം. മധുരമായതിനാല് ഈ വിഭവം കുട്ടികള്ക്കെല്ലാം ഏറെ ഇഷ്ടമാകുമെന്നതില് സംശയമേയില്ല. കുട്ടികള്ക്കും മുതിര്ന്നവര്ക്കും കഴിയ്ക്കാന് പാകത്തില് ഈ ഹല്വ എങ്ങനെ തയ്യാറാക്കാം എന്ന് നോക്കാം.
ആവശ്യമുള്ള സാധനങ്ങള്
നേന്ത്രപ്പഴം- 1
പഞ്ചസാര- കാല്ക്കപ്പ്
നെയ്യ്- 2 ടേബിള് സ്പൂണ്
ബദാം- 3 ടേബിള് സ്പൂണ്
ഏലക്കായ പൊടിച്ചത്-കാല് ടീസ്പൂണ്
തയ്യാറാക്കുന്ന വിധം
ആദ്യം നേന്ത്രപ്പഴം നല്ലതു പോലെ ഉടച്ചെടുക്കുക. അതിനു ശേഷം അത് മാറ്റി വെയ്ക്കാം. പിന്നീട് നോണ്സ്റ്റിക് പാനില് നെയ്യ് ഒഴിച്ച് ചൂടാക്കുക. ഇതിലേക്ക് ബദാം ചെറിയ കഷ്ണമാക്കിയത് ഇട്ട് ഗോള്ഡന് നിറമാകുന്നത് വരെ ഇളക്കുക. ബദാം മാറ്റിയതിനു ശേഷം ബാക്കിയുള്ള നെയ് കൂടെ ചേര്ത്ത് അതിലേക്ക് വാഴപ്പഴം ഇട്ട് ഇളക്കുക. ശേഷം പഞ്ചസാര മിക്സ് ചെയ്യാം. ഇത് നല്ല കട്ടിയാവുന്നതു വരെ ഇളക്കിക്കൊണ്ടിരിയ്ക്കണം. അല്ലെങ്കില് അടിയില് പിടിയ്ക്കാനുള്ള സാധ്യത വളരെ കൂടുതലാണ്. പിന്നീട് ഒരു ടീസ്പൂണ് നെയ് കൂടി ചേര്ക്കാം. ഇത് വീണ്ടും ഹല്വ പാകമാകുന്നതു വരെ ഇളക്കുക. ഇതിലേക്ക് അല്പം ഏലയ്ക്കപ്പൊടി ചേര്ക്കാം. ഹല്വ പരുവം കിട്ടുന്ന പാത്രത്തിലേക്ക് മാറ്റാം. ശേഷം മുകള് ഭാഗം മിനുസമാക്കി തണുത്ത ശേഷം കഷ്ണമാക്കി കഴിയ്ക്കാം.