ന്യൂഡല്‍ഹി: രണ്ടുപതിറ്റാണ്ടത്തെ നീണ്ട ഇടവേളയ്ക്കു ശേഷം ഇന്ത്യയും ചൈനയും ചരിത്ര പോരാട്ടത്തിനിറങ്ങുന്നു. ഇരുപത്തിയൊന്ന് വര്‍ഷത്തെ ഇടവേളയ്ക്ക് ശേഷമാണ് ഇന്ത്യ-ചൈന ഫുട്‌ബോള്‍ മത്സരം നടക്കുന്നത്.
ചൈനയുമായി ഈ വര്‍ഷം ഒക്ടോബറില്‍ ഇന്ത്യ സൗഹൃദമത്സരം കളിക്കുമെന്ന് ഓള്‍ ഇന്ത്യ ഫുട്‌ബോള്‍ ഫെഡറേഷന്‍ പ്രഖ്യാപിച്ചു. 1997 ല്‍ കൊച്ചിയില്‍ നടന്ന നെഹ്റു കപ്പ് മത്സരത്തിലാണ് അവസാനമായി ഇന്ത്യയും ചൈനയും നേര്‍ക്ക് നേര്‍ വന്നത്.
ഫിഫ റാങ്കിംഗില്‍ 75-ം സ്ഥാനത്തുള്ള ചൈനയുമായി സൗഹൃദ മത്സരം കളിക്കാന്‍ കഴിയുന്നത് ഇന്ത്യന്‍ ഫുട്‌ബോളിനെ സംബന്ധിച്ചിടത്തോളം മികച്ച അവസരമാണ്. പ്രത്യേകിച്ചും അടുത്ത വര്‍ഷം ഏഷ്യാകപ്പ് ഫുട്‌ബോള്‍ നടക്കാനിരിക്കേ ഇന്ത്യന്‍ ടീമിന് മികച്ച തയ്യാറെടുപ്പ് കൂടിയായിരിക്കും ഈ മത്സരം.
ഈ വര്‍ഷം ഒക്ടോബര്‍ എട്ടിനും പതിനാറിനും ഇടയ്ക്കുള്ള ഏതെങ്കിലും ദിവസമാകും മത്സരം നടക്കുക. ഒക്ടോബര്‍ 13 ഞായറാഴ്ച മത്സരം നടത്താനാണ് എഐഎഫ്എഫിന്റെ ശ്രമം.
ഫുട്‌ബോള്‍ ചരിത്രത്തില്‍ ഇത് വരെ 17 മത്സരങ്ങളിലാണ് ഇന്ത്യയും ചൈനയും നേര്‍ക്ക് നേര്‍ മത്സരിച്ചത്. ഇതില്‍ 12 തവണ ചൈന വിജയം നേടിയപ്പോള്‍ അഞ്ചെണ്ണം സമനിലയിലാവുകയായിരുന്നു. 1997 ഏപ്രില്‍ പതിനൊന്നാം തീയതി കൊച്ചിയില്‍ നടന്ന നെഹ്റു കപ്പിന്റെ മൂന്നാം സ്ഥാനക്കാരെ കണ്ടെത്തുന്നതിനുള്ള പോരാട്ടത്തിലായിരുന്നു ഇന്ത്യയും ചൈനയും അവസാനമായി ഏറ്റുമുട്ടിയത്. ഇന്ത്യന്‍ ഇതിഹാസതാരം ബൈചുംഗ് ബൂട്ടിയ ഗോള്‍ നേടിയ അന്നത്തെ മത്സരത്തില്‍ ഇന്ത്യ പക്ഷേ 2-1 ന് പരാജയപ്പെടുകയായിരുന്നു.
