ഒന്നര നൂറ്റാണ്ടായി ശാസ്ത്രലോകത്ത് ആശയക്കുഴപ്പം സൃഷ്ടിച്ച തവളയിനങ്ങളെ കുറിച്ചുള്ള വര്ഷങ്ങള് നീണ്ട അന്വേഷണത്തില് പുതിയയിനങ്ങളെ തിരിച്ചറിഞ്ഞു. വടക്കുകിഴക്കന് ഇന്ത്യയില് ഹിമാലയന് മേഖലയിലെ വിദൂര വനപ്രദേശങ്ങളില് നിന്ന് നാലു പുതിയയിനം ‘കൊമ്പന് തവള’കളെയാണ് ഗവേഷകര് കണ്ടെത്തിയത്.
സ്റ്റീഫന് മഹോനി ഡല്ഹി യൂണിവേഴ്സിറ്റിയിലെ ഉഭജീവി ഗവേഷകനും മലയാളിയുമായ ഡോ. സത്യഭാമദാസ് ബിജു, ഐര്ലന്ഡില് യൂണിവേഴ്സിറ്റി കോളേജ് ഡബ്ലിനിലെ പ്രൊഫ. എമ്മ ടെല്ലിങ് എന്നിവരുടെ മേല്നോട്ടത്തില് നടത്തിയ പഠനത്തിലാണ് പുതിയ കൊമ്പന് തവളകളെ തിരിച്ചറിഞ്ഞത്. പതിനാല് വര്ഷത്തെ പഠനം ഇതിന് വേണ്ടിവന്നതായി ഡല്ഹി യൂണിവേഴ്സിറ്റിയുടെ വാര്ത്താക്കുറിപ്പ് പറയുന്നു. പഠനത്തില് ബ്രിട്ടീഷ് നാച്ചുറല് ഹിസ്റ്ററി മ്യൂസിയവും ഉള്പ്പെട്ടിരുന്നു.
ഹിമാലയന് ഹോണ്ഡ് ഫ്രോഗ് (Himalayan horned frog – Megophrys himalayana), ഗാലോ വൈറ്റ് ലിപ്പ്ഡ് ഹോണ്ഡ് ഫ്രോഗ് (Garo white-lipped horned frog – Megophrys oreocrypta), യെല്ലോ സ്പോട്ടഡ് വൈറ്റ് ലിപ്പ്ഡ് ഹോണ്ഡ് ഫ്രോഗ് (Yellow spotted whitelipped horned frog – Megophrys flavipunctata), ജയന്റ് ഹിമാലയന് ഹോണ്ഡ് ഫ്രോഗ് (Giant Himalayan horned frog – Megophrys periosa) എന്നിവയാണ് പുതിയതായി തിരിച്ചറിഞ്ഞ തവളയിനങ്ങളെന്ന് ഒരു അന്താരാഷ്ട്ര ശാസ്ത്രജേര്ണലില് പ്രസിദ്ധീകരിച്ച ഗവേഷണറിപ്പോര്ട്ട് വ്യക്തമാക്കുന്നു.
ഇവയെ ‘കൊമ്പന് തവളകള്’ (Horned Frogs) എന്നു വിളിക്കുന്നത് തവളകളുടെ കണ്ണിന്റെ പുരികങ്ങള് കൊമ്പുപോലെ ഉയര്ന്നിരിക്കുന്നത് കൊണ്ടാണ്. ഏറെക്കാലമായി ശാസ്ത്രലോകത്ത് ആശയക്കുഴപ്പം സൃഷ്ടിക്കുന്ന ഈ ജീവികളെക്കുറിച്ച് ഇപ്പോഴും ഗവേഷകര്ക്ക് ഏറെയൊന്നും അറിയില്ല.
പുതിയ പഠനം വ്യക്തമാക്കുന്നത് വടക്കുകിഴക്കന് ഇന്ത്യയുടെ ജൈവവൈവിധ്യത്തിന്റെ പ്രാധാന്യമാണ്. പുതിയൊരിനം വാനരനെയും പുതിയ പക്ഷിയിനത്തെയും ഒട്ടേറെ മത്സ്യയിനങ്ങളെയും ഇഴജന്തുക്കളെയും പുതിയ ഉഭയജീവി കുടുംബത്തെയും ആ മേഖലയില് നിന്ന് സമീപകാലത്ത് തിരിച്ചറിഞ്ഞിട്ടുണ്ട്. ഉഭയജീവി വൈവിധ്യത്തിന്റെ കാര്യത്തില് വടക്കുകിഴക്കന് ഇന്ത്യ സമ്പന്നമാണെന്ന് ഡോ. സത്യഭാമദാസ് ബിജു പറയുന്നു. ഇവിടം ജൈവവൈവിധ്യ ഹോട്ട്സ്പോട്ടായി പ്രഖ്യാപിച്ചിട്ടുണ്ടെങ്കിലും, മറ്റൊരു ഹോട്ട്സ്പോട്ടായ പശ്ചിമഘട്ടത്തെ അപേക്ഷിച്ച് വടക്കുകിഴക്കന് മേഖല ഇതുവരെ അവഗണിക്കപ്പെട്ട അവസ്ഥയിലായിരുന്നുവെന്നും അദ്ദേഹം അഭിപ്രായപ്പെട്ടു.
ചെറിയ ഭൂപ്രദേശങ്ങളില് മാത്രം കാണപ്പെടുന്നവയാണ് ഈ പഠനത്തില് കണ്ടെത്തിയ സ്പീഷീസുകളെല്ലാമെന്നും മനുഷ്യ പ്രവര്ത്തനം മൂലം ഏഷ്യയിലെ അവശേഷിക്കുന്ന വനപ്രദേശങ്ങള് വേഗം നശിക്കുന്നുവെന്നും തവളകള് പ്രജനനം നടത്തുന്ന നീരൊഴുക്കുകള് മലിനമാകുന്നുണ്ടെന്നും ഈ പശ്ചാത്തലത്തില് ഇത്തരം ജീവികള് അന്യംനിന്ന് പോകാതിരിക്കാന് അവയെക്കുറിച്ച് വേഗം അറിയേണ്ടതുണ്ടെന്നും മഹോനി കൂട്ടിച്ചേര്ത്തു.