പത്തനംതിട്ട: കത്തികൊണ്ട് ദേഹമാസകലം വരഞ്ഞ നിലയില് ആശുപത്രിയില് എത്തിച്ച അഞ്ചു വയസ്സുകാരിക്കു ദാരുണാന്ത്യം. തമിഴ്നാട് രാജപാളയം സ്വദേശിയുടെ മകളാണ് മരിച്ചത്. സംഭവത്തില് കുട്ടിയുടെ രണ്ടാനച്ഛനെ പോലീസ് അറസ്റ്റുചെയ്തു. ഇന്നലെ ഉച്ച കഴിഞ്ഞായിരുന്നു സംഭവം.
മദ്യപിച്ചു ലക്കുകെട്ട നിലയില് 23 വയസ്സുള്ള രണ്ടാനച്ഛനെ കുമ്പഴ കളീക്കല്പടിക്കു സമീപത്തെ വാടക വീട്ടില് നിന്നാണ് പോലീസ് പിടികൂടിയത്. ഇയാളെ ചോദ്യം ചെയ്തുവരുന്നു. മദ്യവും കഞ്ചാവും ഉപയോഗിച്ചതിനാല് ഇനിയും കൃത്യമായ വിവരങ്ങള് ലഭിച്ചിട്ടില്ല. ഇയാള്ക്ക് ബോധം തെളിയാതെ സംഭവിച്ചത് എന്തെന്നു വ്യക്തമാകില്ലെന്നാണ് പോലീസ് പറയുന്നത്.
യുവതിയുടെ ആദ്യ വിവാഹത്തിലുള്ള രണ്ടു മക്കളില് മൂത്ത കുട്ടിയാണ് മരിച്ചത്. ഇളയ കുട്ടി തമിഴ്നാട്ടിലാണ്. കുട്ടിയുടെ അമ്മ മൈലപ്രയിലെ ഒരു വീട്ടില് ജോലിക്കു പോയി മടങ്ങിയെത്തിയപ്പോഴാണ് ശരീരം മുഴുവന് കത്തികൊണ്ട് വരഞ്ഞ നിലയില് കുട്ടി അബോധാവസ്ഥയില് കിടക്കുന്നത് കണ്ടത്.
രണ്ടാനച്ഛനൊപ്പം മകളെ വീട്ടിലിരുത്തിയാണ് അമ്മ ജോലിക്കു പോയത്. കാര്യം അന്വേഷിച്ചപ്പോള് രണ്ടാനച്ഛന് കുട്ടിയുടെ അമ്മയെയും മര്ദിച്ചു. അമ്മ പെണ്കുട്ടിയെ ഉടന് ജനറല് ആശുപത്രിയില് എത്തിച്ചെങ്കിലും മരിച്ചു. പെണ്കുട്ടിയുടെ അമ്മയുടെ മാതാവ് ഇവര്ക്കൊപ്പമായിരുന്നു താമസം. തെരഞ്ഞെടുപ്പുമായി ബന്ധപ്പെട്ട് കഴിഞ്ഞ ദിവസമാണ് ഇവര് തമിഴ്നാട്ടിലേക്ക് പോയത്.
ഇതേത്തുടര്ന്നാണ്, രണ്ടാനച്ഛനൊപ്പം പെണ്കുട്ടിയെ തനിച്ചാക്കി അമ്മയ്ക്കു ജോലിക്കു പോകേണ്ടി വന്നത്. കുട്ടിയുടെ മൃതദേഹം പരിശോധിച്ചപ്പോള് പഴയ മര്ദനപ്പാടുകളും കണ്ടെത്തി. പുറത്തും നെഞ്ചത്തുമാണ് പാടുകള്. പീഡനം നടന്നതായി സംശയമുണ്ടെന്ന് പോലീസ് അറിയിച്ചു.
ജോലിക്കു പോകാതെ മദ്യപിച്ചു വീട്ടില് തന്നെ കഴിയുന്നതാണ് പ്രതിയുടെ രീതിയെന്നു പോലീസ് പറഞ്ഞു. ഇയാളുടെ വീട്ടില്നിന്ന് കഞ്ചാവും പിടിച്ചെടുത്തു. പോലീസ് കസ്റ്റഡിയില് നിന്ന് ഇയാള് കടന്നുകളയാന് ശ്രമിച്ചെങ്കിലും പോലീസ് കീഴ്പ്പെടുത്തുകയായിരുന്നു.