വടവന്നൂര്‍: വീണു തുടയെല്ല് പൊട്ടിയിരിക്കുകയാണെങ്കിലും 87കാരി അമ്മാളു വോട്ട് പാഴാക്കിയില്ല. പേരക്കുട്ടിയുടെ തോളിലേറി പോളിങ് സ്റ്റേഷനിലെത്തി അമ്മാളു വോട്ട് ചെയ്തു. ഇന്നലെ ഉച്ചയ്ക്കാണ് വോട്ടര്‍മാരില്‍ കൗതുകമുണര്‍ത്തി അമ്മാളു (87) വോട്ട് ചെയ്യാനെത്തിയത്.
നടക്കാവില്‍ അപ്പുവിന്റെ ഭാര്യ അമ്മാളുവിന് വീണു പരിക്ക് പറ്റിയത് 6 മാസം മുന്‍പാണ്. വീണു തുടയെല്ല് പൊട്ടിയിരിക്കുകയാണെങ്കിലും അമ്മാളുവിനു വോട്ട് ചെയ്യണമെന്ന് നിര്‍ബന്ധം. പേരക്കുട്ടി ദിലീപ് പിന്നൊന്നും ആലോചിച്ചില്ല, തോളിലെടുത്തു പോളിങ് സ്റ്റേഷനിലേക്കു നടക്കുകയായിരുന്നു. അങ്ങനെ പേരക്കുട്ടി ദിലീപിന്റെ തോളിലേറി വോട്ട് രേഖപ്പെടുത്താന്‍ അമ്മാളു എഎംഎംയുപി സ്‌കൂളിലെ പോളിങ് സ്റ്റേഷനിലെത്തി.
തെരഞ്ഞെടുപ്പില്‍ വോട്ട് ചെയ്യണമെന്ന ആവശ്യം പറഞ്ഞതോടെയാണു തോളിലെടുത്തു കൊണ്ടു വരാന്‍ തീരുമാനിച്ചതെന്നു ഒലക്കോട് വര്‍ക്ക് ഷോപ്പ് നടത്തുന്ന ദിലീപ് പറഞ്ഞു. പോളിങ് ഓഫിസര്‍ വിരല്‍ പതിച്ചാല്‍ മതിയെന്നു പറഞ്ഞെങ്കിലും ഒപ്പിടാന്‍ അറിയാമെന്നു പറഞ്ഞ് ഒപ്പിട്ട ശേഷാണു തന്റെ വോട്ടവകാശം അമ്മാളു വിനിയോഗിച്ചത്.
