കോഴിക്കോട്: നിയന്ത്രണം വിട്ട കാര് നിര്ത്തിയിട്ട സ്കൂട്ടറില് തട്ടി മതിലില് ഇടിച്ച് നാല് വയസ്സുകാരന് ദാരുണാന്ത്യം. കോഴിക്കോട് ജില്ലയിലെ താമരശ്ശേരിയിലാണ് സംഭവം. വയനാട് നടവയല് നെയ്ക്കുപ്പ കാഞ്ഞിരത്തിന്കുന്നേല് ഷിബു മാത്യുവിന്റെ മകന് സാവിയോ ഷിബു (4) ആണ് മരിച്ചത്.
അപകടത്തില് നാല് പേര്ക്ക് പരിക്കേറ്റു. ഷിബു മാത്യു, ഭാര്യ റീജ, റീജയുടെ അമ്മ റീന, സ്കൂട്ടര് യാത്രികനായ താമരശ്ശേരി ചുണ്ടക്കുന്ന് സ്വദേശി അരുണ് എന്നിവര്ക്കാണ് പരുക്കേറ്റത്. വൈകുന്നേരം 4 മണിയോടെയായിരുന്നു അപകടം. അപകടത്തില് കാറിന്റെ മുന്ഭാഗം തകര്ന്നു.
also read: 19കാരി വീട്ടുവളപ്പിലെ കിണറ്റില് മരിച്ച നിലയില്
പരിക്കേറ്റ കാര് യാത്രക്കാരായ ഷിബു, റീന, റീജ, എന്നിവരെ കോഴിക്കോട് മെഡിക്കല് കോളേജ് ആശുപത്രിയില് പ്രവേശിപ്പിച്ചു. സ്കൂട്ടര് ഉടമ താമരശ്ശേരി ചുണ്ടക്കുന്ന് സ്വദേശി അരുണിനെ താമരശ്ശേരി താലൂക്ക് ആശുപത്രിയിലും പ്രവേശിപ്പിച്ചു.
കോഴിക്കോട് ഭാഗത്ത് നിന്നും വയനാട്ടിലേക്ക് പോകുകയായിരുന്ന കാറാണ് വട്ടക്കുണ്ട് പാലത്തിന് സമീപം നിയന്ത്രണം വിട്ട് അപകടത്തില്പ്പെട്ടത്.