കൊച്ചി: യുവതിയെ പൊള്ളലേറ്റ് മരിച്ചനിലയില് കണ്ടെത്തിയ സംഭവത്തില് സഹോദരിക്കായി ലുക്കൗട്ട് നോട്ടീസ് പുറപ്പെടുവിച്ചു. എറണാകുളം ജില്ലയിലെ പറവൂരിലാണ് സംഭവം. പെരുവാരം പനോരമ നഗര് അറയ്ക്കപ്പറമ്പില് വിസ്മയ(25) ആണ് മരിച്ചത്. സംഭവശേഷം വീട്ടില് നിന്ന് കാണാതായ സഹോദരി ജിത്തുവിനായാണ് ലുക്കൗട്ട് നോട്ടീസ് ഇറക്കിയത്.
കഴിഞ്ഞദിവസം വൈകീട്ടു മൂന്നു മണിയോടെയാണ് പെരുവാരം പനോരമ നഗര് അറയ്ക്കപ്പറമ്പില് ശിവാനന്ദന്റെ വീടിനു തീപിടിച്ചത്. ശിവാനന്ദനും ഭാര്യ ജിജിയും പുറത്തുപോയ സമയത്താണു സംഭവം. വീടിനകത്തു നിന്നു പുക ഉയരുന്നതു കണ്ട അയല്വാസികളാണു വിവരം പൊലീസിനെയും ഫയര്ഫോഴ്സിനെയും നഗരസഭാധികൃതരെയും അറിയിച്ചത്.
സംഭവസ്ഥലത്ത് പൊലീസും ഫയര്ഫോഴ്സും എത്തിയപ്പോള് വീടിന്റെ ഗേറ്റ് അകത്തു നിന്നു പൂട്ടിയ നിലയിലും മുന്വശത്തെ വാതില് തുറന്ന നിലയിലുമായിരുന്നു. വീടിന്റെ 2 മുറികള് പൂര്ണമായി കത്തി നശിച്ചു. അതില് ഒന്നിലാണു വിസ്മയയുടെ മൃതദേഹം കിടന്നിരുന്നത്.
മൃതദേഹം പൂര്ണമായി കത്തി തിരിച്ചറിയാന് സാധിക്കാത്ത അവസ്ഥയിലായിരുന്നു. സംഭവത്തിന് പിന്നാലെ ജിത്തുവിനെ കാണാതാവുകയായിരുന്നു. സിസിടിവിയില് ജിത്തുവിന്റെ ദൃശ്യങ്ങള് പതിഞ്ഞിട്ടുണ്ട്. ജിത്തുവിന് സ്വന്തമായി ഫോണില്ല. വിസ്മയയുടെ ഫോണാണ് ഉപയോഗിച്ചിരുന്നത്.
ജിത്തുവിന്റെ കെവശമുണ്ടായിരുന്ന മൊബൈല് ഫോണ് വൈപ്പിന് എടവനക്കാട് ലൊക്കേഷന് കാണിച്ചിരുന്നു. തുടര്ന്ന് പൊലീസ് ആ ഭാഗത്ത് പരിശോധന നടത്തിയെങ്കിലും ഫോണ് ഓഫായതിനാല് ജിത്തുവിനെ കണ്ടെത്താനായില്ല. വീടിന്റെ കട്ടിളപ്പടിയിലും മറ്റും രക്തത്തുള്ളികള് കണ്ടതാണ് മരണത്തില് ദുരൂഹത വര്ധിപ്പിക്കുന്നത്. യുവതികള് തമ്മില് പിടിവലി നടന്നതിന്റെ ലക്ഷണമാകാം ഇതെന്നാണ് പൊലീസിന്റെ പ്രാഥമിക നിഗമനം.