സുല്ത്താന് ബത്തേരി: കേരളത്തില് നോറോ വൈറസ് ബാധ സ്ഥിരീകരിച്ചു. വയനാട് ജില്ലയിലെ പൂക്കോട് വെറ്ററിനറി കോളജ് വിദ്യാര്ത്ഥികളില് നിന്ന് ശേഖരിച്ച സാമ്പിളുകള് ആലപ്പുഴ നാഷണല് വൈറോളജി ഇന്സ്റ്റിറ്റ്യൂട്ടില് പരിശോധിച്ചപ്പോഴാണ് നോറോ വൈറസ് സാന്നിധ്യം കണ്ടെത്തിയത്.
രോഗം മലിനമായ ജലത്തിലൂടെയും, ഭക്ഷണത്തിലൂടെയുമാണ് പകരുന്നത്. രോഗ ബാധയേറ്റ വ്യക്തികളുമായി നേരിട്ടുള്ള സമ്പര്ക്കത്തിലൂടെയും രോഗം പടരും. വെറ്ററിനറി കോളേജ് വനിതാ ഹോസ്റ്റലിലെ വിദ്യാര്ത്ഥികള്ക്കിടയില് വയറിളക്കവും, ഛര്ദ്ദിയും റിപ്പോര്ട്ട് ചെയ്തതിനെ തുടര്ന്നാണ് ആരോഗ്യ വകുപ്പിന്റെ നേത്യത്വത്തില് വിദഗ്ദ സംഘം സ്ഥലം സന്ദര്ശിച്ച് വിദ്യാര്ത്ഥികളുടെ മലം പരിശോധനയ്ക്കായി അയച്ചത്.
ജില്ലയുടെ വിവിധ ഭാഗങ്ങളില് സമാനമായ രോഗ ലക്ഷണങ്ങള് റിപ്പോര്ട്ട് ചെയ്യപ്പെടുന്നതിനാല് പ്രതിരോധ പ്രവര്ത്തനങ്ങള് ഊര്ജിതപ്പെടുത്തിയിട്ടുണ്ടെന്നും പൊതുജനങ്ങള് ജാഗ്രത പാലിക്കണമെന്നും ജില്ലാ മെഡിക്കല് ഓഫീസര് ഡോ. ആര് രേണുക അറിയിച്ചു.