തിരുവനന്തപുരം: കേരളത്തില് ചൊവ്വാഴ്ചയോടെ മഴ കനക്കുമെന്ന് കാലാവസ്ഥ നിരീക്ഷണ കേന്ദ്രത്തിന്റെ മുന്നറിയിപ്പ്. ബംഗാള് ഉള്ക്കടലിലെ ചക്രവാതച്ചുഴി ന്യൂനമര്ദ്ദമായി മാറുന്നതോടെയാണ് മഴ ശക്തമാകുന്നത്. വ്യാഴാഴ്ച അഞ്ച് ജില്ലകളില് ഓറഞ്ച് അലര്ട്ട് പ്രഖ്യാപിച്ചു.
കോട്ടയം, ഇടുക്കി, പാലക്കാട്, മലപ്പുറം, വയനാട് ജില്ലകളിലാണ് ഓറഞ്ച് അലര്ട്ട് പ്രഖ്യാപിച്ചത്. ചൊവ്വാഴ്ചയും ബുധനാഴ്ചയും ഒറ്റപ്പെട്ട ശക്തമായ മഴ കിട്ടും. തെക്ക് കിഴക്കന് ബംഗാള് ഉള്ക്കടലില് സുമാത്ര തീരത്തായാണ് ന്യൂനമര്ദ്ദം രൂപപ്പെടുന്നത്.
ഇത് അതിതീവ്ര ന്യൂനമര്ദ്ദമായി മാറാനും വടക്കന് തമിഴ്നാട് തീരത്ത് കരയില് പ്രവേശിക്കാനും സാധ്യതയുണ്ടെന്നാണ് കാലാവസ്ഥ നിരീക്ഷണ കേന്ദ്രത്തിന്റെ വിലയിരുത്തല്. ഇതിന്റെ സ്വാധീനഫലമായാണ് കേരളത്തിലും മഴ കനക്കുക.
ചെന്നൈയില് ഇപ്പോള്ത്തന്നെ കനത്ത മഴയാണ് അനുഭവപ്പെടുന്നത്.
നഗരത്തിലെ താഴ്ന്ന ഇടങ്ങളില് പലയിടത്തും വലിയ വെള്ളക്കെട്ടുകള് രൂപപ്പെട്ടു. മൂന്ന് ജലസംഭരണികളില് നിന്ന് വെള്ളം ഒഴുക്കിവിടുന്നതിനാല് ചെന്നൈയില് പ്രളയ മുന്നറിയിപ്പ് പുറപ്പെടുവിച്ചിട്ടുണ്ട്. നൂറ് കണക്കിന് കുടുംബങ്ങളെ മാറ്റിപ്പാര്പ്പിച്ചു.