തൃശൂര്: മദ്യപിച്ചെത്തി ഭര്ത്താവ് നിരന്തരം ഉപദ്രവിക്കുന്നുവെന്ന ഭാര്യയുടെ പരാതി അന്വേഷിക്കാന് വീട്ടിലെത്തിയ പോലീസ് കണ്ടത് ജീവനായി പിടയുന്ന യുവാവിനെ. തൃശ്ശൂരിലാണ് സംഭവം. ഭര്ത്താവിനെ അന്വേഷിച്ച് വീട്ടിനുള്ളില് കയറിയ പോലീസ് ഇയാള്
ആത്മഹത്യ ചെയ്യാന് ശ്രമിക്കുന്നതാണ് കണ്ടത്. ഉടന് തന്നെ ആശുപത്രിയിലെത്തിച്ചതിനാല് ജീവന് രക്ഷിക്കാന് കഴിഞ്ഞു.
തൃശൂര് മെഡിക്കല് കോളജ് പൊലീസ് സ്റ്റേഷനിലാണ് തിങ്കളാഴ്ച രാത്രി പതിനൊന്ന് മണിക്ക് ഭര്ത്താവിനെതിരെ യുവതിയുടെ പരാതി ലഭിച്ചത്. പട്രോളിങ്ങിലുണ്ടായിരുന്ന എസ്ഐ ബാബുവും സിവില് പൊലീസ് ഓഫീസര് കെകെ ഗിരീഷും ഉടന് സ്ഥലത്തെത്തി.
പൊലീസ് എത്തുമ്പോള് യുവതി വീടിനുപുറത്ത് തന്നെയുണ്ടായിരുന്നു. സ്ഥിരം മദ്യപിച്ചെത്തുന്ന ഭര്ത്താവ് തന്നെ നിരന്തരം മര്ദ്ദിക്കാറുണ്ടെന്ന് അവര് പൊലീസിനോട് പറഞ്ഞു. ഭര്ത്താവിനെ അന്വേഷിച്ച് മുറിക്കകത്തേക്ക് കയറിയപ്പോള് ഉള്ളില് നിന്നും പൂട്ടിയ മുറിയില് ആത്മഹത്യ ചെയ്യാന് ശ്രമിക്കുന്നതാണ് കണ്ടത്.
ഉടന് പൊലീസുദ്യോഗസ്ഥര് വാതില് തകര്ത്ത് ഭര്ത്താവിനെ രക്ഷിച്ച് പൊലീസ് വാഹനത്തില് തന്നെ മെഡിക്കല് കോളജ് ആശുപത്രിയിലെത്തിച്ചു.യുവാവ് അപകടനില തരണംചെയ്തിട്ടുണ്ട്. ഒരു മിനിറ്റെങ്കിലും വൈകിയിരുന്നെങ്കില് ഇയാളുടെ ജീവന് നഷ്ടമാകുമായിരുന്നുവെന്ന് പൊലീസ് പറഞ്ഞു.