അഞ്ചല്: സാമൂഹ്യവിരുദ്ധര് വിഷം കലര്ത്തിയതോടെ ചത്തുപൊങ്ങിയത് പ്രവാസിയുടെ കൃഷിയിടത്തിലെ ആയിരക്കണക്കിന് മീനുകള്. കൊവിഡ് പ്രതിസന്ധിയില് നാട്ടിലെത്തി മത്സ്യകൃഷി തുടങ്ങിയ പനച്ചവിള കുമാരഞ്ചിറ വീട്ടില് ആലേഷിന്റെ വീട്ടിന് മുന്നിലെ മത്സ്യക്കുളത്തിലാണ് സാമൂഹ്യവിരുദ്ധര് വിഷം കലക്കിയത്.
ഇതോടെ വിളവെടുക്കാന് പാകമായ ആയിരക്കണക്കിന് മത്സ്യങ്ങള് ചത്തുപൊങ്ങി. കൊവിഡ് കാലത്ത് വിദേശത്ത് ജോലി നഷ്ടപ്പെട്ടാണ് ആലേഷ് നാട്ടില് തിരിച്ചെത്തിയത്. കൊവിഡ് പ്രതിസന്ധി മറികടക്കാന് ബാങ്ക് വായ്പയെടുത്തും സുഹൃത്തുക്കളില് നിന്നും കടം വാങ്ങിയുമാണ് ആലേഷ് അമ്മയുടെ സഹായത്തോടെ മത്സ്യകൃഷി തുടങ്ങിയത്.
ഇതിനായി വീടിന് മുന്നില് കുളം തയ്യാറാക്കി. സുഭിക്ഷ കേരളം പദ്ധതിയുടെയും പഞ്ചായത്തിന്റെയും സഹായത്തോടെ മീന്കുഞ്ഞുങ്ങളെ നിക്ഷേപിച്ചു. ഇതിനായി ഏകദേശം മൂന്ന് ലക്ഷം രൂപയാണ് ചെലവായത്. കുടുംബശ്രീയില് നിന്നാണ് അമ്മ ഒരു ലക്ഷം വായ്പയെടുത്ത് നല്കിയത്.
മീന് വിറ്റുകിട്ടുന്ന പണം കൊണ്ട് കടം വീട്ടാമെന്ന് കരുതിയിരിക്കെയാണ് ദാരുണ സംഭവം. നാട്ടില് പ്രകടമായ ശത്രുക്കളൊന്നുമില്ലെന്ന് അമ്മ മല്ലികയും ആലേഷും പറയുന്നു. സംഭവത്തില് പൊലീസില് പരാതി നല്കിയിട്ടുണ്ട്.