തിരുവനന്തപുരം: കേരളത്തില് മിക്ക സ്ഥലങ്ങളിലും മഴ തുടരുകയാണ്. ഈ സാഹചര്യത്തില് ജനങ്ങള് അതീവ ജാഗ്രത കാണിക്കണമെന്ന് മുഖ്യമന്ത്രി പിണറായി വിജയന് അറിയിച്ചു. അപകട സാഹചര്യങ്ങളില് പെടാതിരിക്കാനുള്ള മുന്കരുതലുണ്ടാകണമെന്ന് മുഖ്യമന്ത്രി പറഞ്ഞു.
വേണ്ടിവന്നാല് മാറി താമസിക്കാനും അധികൃതരുടെ നിര്ദേശങ്ങള് പാലിക്കാനും അനാവശ്യ യാത്രകള് ഒഴിവാക്കാനും ശ്രദ്ധിക്കണമെന്നും മുഖ്യമന്ത്രി നിര്ദേശിച്ചു. ഇന്ന് സംസ്ഥാനത്ത് ഇടിമിന്നലിനും ശക്തമായ കാറ്റിനും സാധ്യതയുള്ളതായി കേന്ദ്ര കാലാവസ്ഥാ വകുപ്പ് മുന്നറിയിപ്പ് നല്കിയിട്ടുണ്ട്.
അറബിക്കടലില് ലക്ഷദീപിനു സമീപം രൂപം കൊണ്ട ന്യൂനമര്ദ്ദം നിലവില് ശക്തി കുറഞ്ഞു. എങ്കിലും വൈകുന്നേരം വരെ മഴ തുടരാന് സാധ്യതയുള്ളതായാണ് കാലാവസ്ഥാ പ്രവചനം. കേന്ദ്ര കാലാവസ്ഥാ വകുപ്പിന്റെ രാവിലെ 10 മണിക്ക് പുറപ്പെടുവിച്ച മുന്നറിയിപ്പ് പ്രകാരം ഇന്ന് തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം, തൃശ്ശൂര് പാലക്കാട് മലപ്പുറം, കോഴിക്കോട് എന്നി ജില്ലകളില് മഞ്ഞ അലര്ട്ടാണ് പ്രഖ്യാപിച്ചിട്ടുള്ളത്.
സംസ്ഥാനത്താകെ 105 ദുരിതാശ്വാസ ക്യാമ്പുകള് തുറന്നിട്ടുണ്ട്. ആവശ്യം വന്നാല് കൂടുതല് ക്യാമ്പുകള് അതിവേഗം തുടങ്ങാന് സജ്ജീകരണമൊരുക്കിയിട്ടുമുണ്ട്.