ശ്രീകണ്ഠപുരം: കാത്തിരുന്ന കിട്ടിയ പിഞ്ചുകുഞ്ഞിനെയും ഭാര്യയെയും കുത്തിപ്പരിക്കേല്പ്പിച്ച് യുവാവ് കഴുത്തറുത്ത് മരിച്ച സംഭവത്തിന്റെ ഞെട്ടല് മാറാതെ ഒരു നാട്. ഏരുവേശ്ശി മുയിപ്ര ഞെക്ലിയിലാണ് ദാരുണ സംഭവം. സതീഷ് എന്നയാളാണ് മകന് ധ്യാന്ദേവിനെയും ഭാര്യ അഞ്ചുവിനെയും കുത്തിപ്പരിക്കേല്പ്പിച്ച് ശേഷം കഴുത്തറുത്ത് മരിച്ചത്.
മാനസികാസ്വാസ്ഥ്യത്തിന് ചികിത്സയില് കഴിയുകയായിരുന്ന സതീഷ് കുറച്ചുദിവസമായി മരുന്ന് കഴിക്കാറില്ലെന്നും ബന്ധുക്കള് പറയുന്നു. ഗള്ഫില് ഷെഫായി ജോലിചെയ്തിരുന്ന സതീഷ് നാലുവര്ഷം മുന്പാണ് നാട്ടിലെത്തിയത്. കഴിഞ്ഞദിവസങ്ങളില് സതീഷിന്റെ സ്വഭാവത്തില് ചെറിയ മാറ്റംകണ്ടതിനെത്തുടര്ന്ന് വെള്ളിയാഴ്ച ആശുപത്രിയില് പോകാനായി സഹോദരന് സനോജ് വീട്ടില് എത്തിയിരുന്നു.
ഇതിനിടെയായിരുന്നു സംഭവം. രാവിലെ അമ്മയെ മുറിക്ക് പുറത്താക്കി കിടപ്പുമുറിക്കുള്ളില് കയറി കതകടച്ച സതീഷ് ഭാര്യയെയും കുഞ്ഞിനെയും കത്തി ഉപയോഗിച്ച് കുത്തുകയായിരുന്നു. തുടര്ന്ന് സ്വയം കഴുത്തറുക്കുകയും ചെയ്തു. നിലവിളിശബ്ദംകേട്ട് ഓടിയെത്തിയ അമ്മയും സഹോദരനും സമീപവാസികളും ചേര്ന്ന് മുറിയുടെ പുറത്തെ ജനല്വഴി നോക്കിയപ്പോഴാണ് ചോരയില് മുങ്ങിയ മൂവരെയും കണ്ടത്.
തുടര്ന്ന് വാതില് ചവിട്ടിപ്പൊളിച്ച് അകത്തുകയറിയാണ് ഇവരെ പുറത്തെത്തിച്ചത്. കുട്ടി മുറിക്കകത്തെ കസേരയ്ക്ക് സമീപവും സതീഷും അഞ്ജുവും നിലത്തുമാണ് വീണുകിടന്നിരുന്നതെന്ന് ആദ്യം ഓടിയെത്തിയ സമീപവാസി മാത്യു കൊട്ടാരത്തില് പറഞ്ഞു. ഉടനെ അഞ്ജുവിനെയും കുഞ്ഞിനെയും സഹോദരന് സനോജും സമീപവാസികളും ചേര്ന്ന് ആസ്പത്രിയിലെത്തിക്കുകയായിരുന്നു.
സതീഷ് സംഭവസ്ഥലത്തുവെച്ചുതന്നെ മരിച്ചു. ഇയാളുടെ കഴുത്തില് ആഴത്തില് മുറിവേറ്റിരുന്നു. തലയ്ക്ക് പിന്നിലാണ് മകന് ധ്യാന്ദേവിന് കുത്തേറ്റത്. ഭാര്യ അഞ്ജുവിന് കഴുത്തിനാണ് കുത്തേറ്റത്. ചികിത്സയില് കഴിയുന്ന അഞ്ജുവിന്റെ നില തൃപ്തികരമാണെന്ന് ബന്ധുക്കള് അറിയിച്ചു.
വിവാഹം കഴിഞ്ഞ് ഏഴുവര്ഷത്തിനുശേഷം ഈ മാര്ച്ചിലാണ് സതീഷിനും അഞ്ജുവിനും കുഞ്ഞ് ജനിച്ചത്. ഗള്ഫില്നിന്ന് നാട്ടിലെത്തിയ സതീഷ് ഇടയ്ക്ക് ചില പരിപാടികള്ക്ക് പാചകം ചെയ്യാന് പോകുന്നതല്ലാതെ കാര്യമായ ജോലിയൊന്നും ചെയ്തിരുന്നില്ല.