കൊല്ലം: പതിനെട്ടുകാരി ഗൗരി നന്ദയാണ് ഇപ്പോള് സോഷ്യല്മീഡിയയിലെ താരം. നാട്ടുകാര്ക്ക് മുന്നില് പൊലീസിനെ വിറപ്പിച്ച ഗൗരിനന്ദയെ ഉശിരുള്ള പെണ്കുട്ടിയെന്നാണ് സോഷ്യല്മീഡിയ അഭിസംബോധന ചെയ്യുന്നത്. സാമൂഹ്യ അകലം പാലിക്കാന് സ്ഥലമില്ലാത്ത സ്വകാര്യ ബാങ്കിന് മുന്നില് കൂട്ടംകൂടി നിന്നുവെന്ന പേരില് പൊലീസ് പിഴ ചുമത്തിയതോടെയാണ് ഗൗരിനന്ദ പൊട്ടിത്തെറിച്ചത്.
ചടയമംഗലത്തെ സ്വകാര്യ ബാങ്കിന് മുന്നില് തിങ്കളാഴ്ച രാവിലെ 11 മണിക്കായിരുന്നു സംഭവം. അമ്മയ്ക്കൊപ്പം ആശുപത്രിയില് പോയ ശേഷം എ.ടി.എമ്മില് നിന്ന് പണമെടുക്കാന് ബാങ്കിന് മുന്നിലെത്തിയതായിരുന്നു ഗൗരിനന്ദ. തിരിച്ചിറങ്ങിയപ്പോള് പൊലീസ് ആളുകള്ക്ക് മഞ്ഞ പേപ്പറില് എന്തോ എഴുതി കൊടുക്കുന്നു. ഒരാളോട് കാര്യം തിരക്കിയപ്പോള് സാമൂഹ്യഅകലം പാലിക്കാത്തതിന് പിഴ അടയ്ക്കാനുള്ള പൊലീസിന്റെ നോട്ടീസ് കാണിച്ചു.
ഇതിനിടെ പൊലീസ് ഗൗരിനന്ദയ്ക്കും പിഴ ചുമത്തി. കാര്യം തിരക്കിയപ്പോള് വളരെ മോശമായ ഭാഷയിലായിരുന്നു പൊലീസുകാരന്റെ പ്രതികരണമെന്ന് ഗൗരിനന്ദ പറയുന്നു. ഇതോടെ ഗൗരി പ്രതികരിച്ചു. തര്ക്കം അരമണിക്കൂറോളം നീണ്ടു. ആളുകള് തടിച്ചുകൂടി. പെണ്ണല്ലായിരുന്നെങ്കില് കാണിച്ചുതരാമെന്ന് പൊലീസ് ഉദ്യോഗസ്ഥന് പറഞ്ഞതോടെ ഗൗരി പൊട്ടിത്തെറിച്ചു. എന്നാല് പൊലീസ് വിട്ടില്ല. കൃത്യനിര്വഹണം തടസപ്പെടുത്തിയെന്ന പേരില് ഗൗരിക്കെതിരെ പോലീസ് ജാമ്യമില്ലാ വകുപ്പ് ചുമത്തി കേസെടുത്തിട്ടുണ്ട്.
ഇങ്ങനെ പറയണ്ടായിരുന്നു, പൊലീസല്ലേ, പ്രശ്നമാകും, മാപ്പ് പറഞ്ഞ് തീര്ത്തേക്ക് എന്നൊക്കെ പലരും ഉപദേശിച്ചെങ്കിലും നിയമപരമായി നേരിടാനാണ് ഗൗരിയുടെ തീരുമാനം. പൊലീസ് ഉദ്യോഗസ്ഥന് അപമാനിച്ചെന്നും അന്യായമായി പിഴ ചുമത്തിയെന്നും ആരോപിച്ച് ഗൗരി യുവജന കമ്മിഷന് പരാതി നല്കി. ചടയമംഗലം സ്വദേശിനിയാണ് ഗൗരി. ഇപ്പോള് പ്ലസ് ടു പരീക്ഷയുടെ ഫലം കാത്തിരിക്കുകയാണ്. അച്ഛന് അനില്കുമാറിന് കൂലിപ്പണിയാണ്. അമ്മ സ്വകാര്യ സ്ഥാപനത്തില് അക്കൗണ്ടന്റാണ്.