കൊച്ചി: സ്പൈനല് മസ്കുലര് അട്രോഫി എന്ന അപൂര്വ്വ രോഗത്തിന്റെ പിടിയിലകപ്പെട്ട എട്ട് വയസ്സുകാരന് അനന്തനുമായി ജീവിതത്തോട് പോരടിക്കുകയാണ് അമ്മ ലതികയും അച്ഛന് അനില് കുമാറും. അടച്ചുറപ്പുള്ള ഒരു വീടുപോലുമില്ല കുടുംബം മകന്റെ ചികിത്സയ്ക്കായി കഷ്ടപ്പെടുകയാണ്.
കൊച്ചിയിലെ പുറമ്പോക്ക് കോളനിയിലാണ് അനന്തനും അച്ഛനും അമ്മയും താമസിക്കുന്നത്. സാമ്പത്തിക ബാധ്യത കാരണം മകന്റെ ഫിസിയോതെറാപ്പിയും മുടങ്ങുമോ എന്ന ആശങ്കയിലാണ് ഇപ്പോള് ഈ കുടുംബം. അനന്തന് പുറംലോകം ഒന്ന് കാണണമെങ്കില് അമ്മ നെഞ്ചോട് ചേര്ത്ത് വാരിയെടുത്ത് ഇങ്ങനെ നടക്കണം.
കമിഴ്ന്ന് നീന്തിയ കുഞ്ഞ് നടക്കാത്തതെന്തെന്ന സംശയത്തിലാണ് ഡോക്ടറെ ചെന്ന് കണ്ടത്. ഒന്നരവയസ്സില് മകന് സ്പൈനല് മസ്കുലര് അട്രോഫി എന്ന അപൂര്വ്വ രോഗമെന്ന് അറിഞ്ഞു. ഫിസിയോ തെറാപ്പി മാത്രമാണ് രോഗത്തിന് പരിഹാരമെന്ന് എട്ട് വര്ഷങ്ങള്ക്ക് മുന്പ് കേട്ടതിന്റെ മരവിപ്പ് ഇന്ന് ലതികക്കില്ല.
മകന് ആരോഗ്യവാനായി നടക്കാന് മരുന്നുണ്ട്. എന്നാല് അതിനുവേണ്ടുന്ന പണമില്ല. മരുന്ന് എത്തും വരെ മകനെ കണ്ണിമ ചിമ്മാതെ കാക്കണം. പ്രതിരോധ ശേഷിയെ പരീക്ഷിക്കുന്ന ഒരു ചെറിയ പനിക്ക് പോലും അവസരം ഒരുക്കാതെ. കടവന്ത്ര കേന്ദ്രീയ വിദ്യാലയത്തില് മൂന്നാം ക്ലാസില് പഠിക്കുന്ന അനന്തന് വാനോളമാണ് സ്വപ്നങ്ങള്.
സ്വപ്നങ്ങളിലേക്ക് നടന്നെത്താന് അനന്തനും, അമ്മ ലതികയും ചെയ്യുന്ന ഈ അദ്ധ്വാനത്തിന് സര്ക്കാരിന്റെയും, പൊതുസമൂഹത്തിന്റെയും പിന്തുണ കൂടിയേ തീരൂ. സുമനസ്സുകളുടെ സഹായം ലഭിക്കുമന്ന പ്രതീക്ഷയിലാണ് കുടുംബം.