ആലപ്പുഴ: വോട്ടെടുപ്പ് ദിവസം കായംകുളത്ത് കോണ്ഗ്രസ് ബൂത്ത് ഏജന്റിന് പരിക്കേറ്റത് രാഷ്ട്രീയ സംഘര്ഷത്തില് അല്ലെന്ന് വെളിപ്പെടുത്തലുമായി ഭാര്യ. കോണ്ഗ്രസ് ബൂത്ത് ഏജന്റ് സോമനാണ് പരിക്കേറ്റ് ആശുപത്രിയില് കഴിയുന്നത്. രാഷ്ട്രീയ സംഘര്ഷത്തിലാണ് സോമന് പരിക്കേറ്റതെന്ന് വാര്ത്ത പുറത്തുവന്നിരുന്നു.
ഇതിന് പിന്നാലെയാണ് സത്യാവസ്ഥ വെളിപ്പെടുത്തി സോമന്റെ ഭാര്യ രാജി രംഗത്തെത്തിയത്. കുടുംബവഴക്കിനെ തുടര്ന്നാണ് സോമന് പരിക്കേറ്റതെന്നാണ് രാജി പറയുന്നത്. സംഭവത്തിന് പിന്നില് രാഷ്ട്രീയമില്ലെന്നും രാജി പറഞ്ഞു. വോട്ടെടുപ്പ് കഴിഞ്ഞ് വീട്ടിലെത്തിയ സോമനും മകനും മുറി പൂട്ടിയിട്ടതിനെച്ചൊല്ലി വഴക്കുണ്ടായി.
താക്കോലിന് വേണ്ടി അച്ഛനും മകനും തമ്മിലുള്ള വഴക്ക് അടിപിടിയിലെത്തി. ഇതിനിടെ തന്നെ മര്ദിച്ച് ഓടിക്കാന് ശ്രമിക്കുന്നതിനിടെ മുള്ളുവേലിയില് വീണ് സോമന് പരിക്കേറ്റുവെന്നും രാജി പറയുന്നു. രാജി ഇക്കാര്യം വെളിപ്പെടുത്തുന്ന വീഡിയോ പുറത്തുവന്നിട്ടുണ്ട്.
വോട്ടെടുപ്പ് ദിവസം രാത്രിയാണ് കായംകുളം പുതുപ്പള്ളി 55ാം നമ്പര് ബൂത്തിലെ കോണ്ഗ്രസ് ബൂത്ത് ഏജന്റായ സോമന് നേരേ ആക്രമണമുണ്ടായി എന്ന വാര്ത്ത പുറത്തുവന്നത്. സോമനെ ആശുപത്രിയില് പ്രവേശിപ്പിച്ചിരുന്നു.