കണ്ണൂര്: തലശ്ശേരിയില് ബിജെപിയ്ക്ക് സ്ഥാനാര്ത്ഥി ഇല്ലാത്ത സാഹചര്യത്തിലായതിനാല് കേന്ദ്ര ആഭ്യന്തരമന്ത്രിയും ബിജെപി മുതിര്ന്ന നേതാവുമായ അമിത് ഷായുടെ തലശ്ശേരിയിലെ പ്രചരണ പരിപാടി റദ്ദാക്കി. തൃപ്പൂണിത്തുറയിലാണ് അമിത് ഷായുടെ ആദ്യ പൊതു പരിപാടി ഒരുക്കിയിരിക്കുന്നത്.
നാളെ രാവിലെയാണ് പരിപാടി. അതിന് ശേഷം പൊന്കുന്നത്തും പുറ്റിങ്ങലിലും കഞ്ചിക്കോട്ടും അമിത് ഷാ സംസാരിക്കും. എന്.ഡി.എയുടെ തെരഞ്ഞെടുപ്പ് പ്രചാരണത്തിനായി ഇന്ന് രാത്രിയാണ് അമിത് ഷാ കൊച്ചിയിലെത്തുക. രാത്രി ഒന്പതിന് നെടുമ്പാശ്ശേരി വിമാനത്താവളത്തിലെത്തുന്ന അമിത് ഷാ നാളെ രാവിലെ നെടുമ്പാശ്ശേരിയില് നിന്നും ഹെലികോപ്റ്ററില് തൃപ്പൂണിത്തുറയിലെത്തും.
പത്തരയ്ക്ക് സ്റ്റാച്യു ജംങ്ഷനില് നിന്ന് പൂര്ണത്രയീശ ക്ഷേത്ര ജംഗ്ഷനിലേക്കുള്ള റോഡ് ഷോയില് പങ്കെടുക്കും. തുടര്ന്ന് പതിനൊന്നരയോടെ കാഞ്ഞിരപ്പള്ളിയിലെത്തുന്ന അമിത് ഷാ പൊന്കുന്നം ശ്രേയസ് പബ്ലിക് സ്കൂള് മൈതാനത്ത് പൊതുസമ്മേളനത്തില് പ്രസംഗിക്കും.
2.30 ന് പുറ്റിങ്ങല് ദേവീ ക്ഷേത്ര മൈതാനത്ത് പൊതുസമ്മേളനത്തില് സംസാരിക്കും. തുടര്ന്ന് കഞ്ചിക്കോട്ട് എത്തുന്ന അദ്ദേഹം 4.55 ന് കഞ്ചിക്കോട് മുതല് സത്രപ്പടിവരെ റോഡ് ഷോ നടത്തും. തുടര്ന്ന് കോയമ്പത്തൂരിലേക്ക് പോകും. 2016ല് കണ്ണൂര് ജില്ലയില് ബി.ജെ.പിക്ക് ഏറ്റവും കൂടുതല് വോട്ട് കിട്ടിയ മണ്ഡലമാണ് തലശേരി.
22,125 വോട്ടുകളാണ് ബി.ജെ.പിക്ക് വേണ്ടി മത്സരിച്ച സജീവന് അന്ന് ഇവിടെ നേടിയത്. ഇവിടെയാണ് ജില്ലാ പ്രസിഡന്റ് കൂടിയായ എന്. ഹരിദാസിന്റെ പത്രിക തളളിയത്. തലശേരിയിലും ദേവികുളത്തും ഗുരുവായൂരിലും സ്ഥാനാര്ത്ഥികളുടെ നാമനിര്ദേശ പത്രിക തളളിയതിലൂടെ പ്രതിസന്ധിയിലായിരിക്കുകയാണ് ബി.ജെ.പി സംസ്ഥാന നേതൃത്വം.