മലപ്പുറം : വാഹനാപകടത്തില് അധ്യാപികയ്ക്ക് ദാരുണാന്ത്യം. തിരൂര് ഗവ. ഹയര് സെക്കന്ഡറി സ്കൂള് യുപി വിഭാഗം അധ്യാപിക ആലത്തിയൂര് പൊയിലിശ്ശേരി ഗോപാലത്തില് ഉദയഭാനുവിന്റെ ഭാര്യ ജയലതയാണ് മരിച്ചത്. അമ്പത്തിയൊന്ന് വയസ്സായിരുന്നു.
സ്കൂളില് നിന്നും മടങ്ങുന്നതിനിടെ തിങ്കളാഴ്ച വൈകീട്ടായിരുന്നു അപകടം. അധ്യാപിക സഞ്ചരിച്ചിരുന്ന സ്കൂട്ടറില് കണ്ടെയ്നര് ലോറി ഇടിക്കുകയായിരുന്നു. ഗുരുതര പരിക്കേറ്റ ഇതേ സ്കൂളിലെ അധ്യാപിക പൊയിലിശ്ശേരി ജയമന്ദിരത്തില് ലതയെ സ്വകാര്യ ആശുപത്രിയില് പ്രവേശിപ്പിച്ചു.
കണ്ടെയ്നര് ലോറി സ്കൂട്ടറില് തട്ടി മറിഞ്ഞതിനെ തുടര്ന്ന് ജയലത റോഡിലേക്ക് തെറിച്ച് വീഴുകയായിരുന്നു. ഇവരുടെ ദേഹത്ത് ലോറിയുടെ പിന്ചക്രം കയറിയിറങ്ങി. ആലത്തിയൂരിലെ സ്വകാര്യ ആശുപത്രിയില് എത്തിച്ചെങ്കിലും ജീവന് രക്ഷിക്കാനായില്ല.