ആലപ്പുഴ: സംസ്ഥാനത്ത് വീണ്ടും പക്ഷിപ്പനി റിപ്പോര്ട്ട് ചെയ്തു. ആലപ്പുഴ ജില്ലയിലാണ് സംഭവം. കൈനകരിയില് അഞ്ഞൂറോളം താറാവുള്പ്പടെയുള്ള പക്ഷികള് ചത്തത് പക്ഷിപ്പനി മൂലമാണെന്ന് സ്ഥിരീകരിച്ചു. പ്രദേശത്ത് ഇന്ന് ഉച്ചയ്ക്ക് 12 മണിയോടെ കളളിങ് നടക്കും.
ഇവിടെ നിന്ന് ശേഖരിച്ച സാമ്പിളുകള് ഭോപ്പാലിലെ ഹൈ സെക്യൂരിറ്റി അനിമല് ഡിസീസസ് ലബോറട്ടറിയില് പരിശോധിച്ചതിന്റെ ഫലം എത്തിയതോടെയാണ് വൈറസ് രോഗബാധയെന്ന് ഉറപ്പിച്ചത്. ഇതോടെ നിരവധി താറാവുകളെയും കോഴികളെയും നശിപ്പിക്കേണ്ടി വരും.
കൈനകരിയില് മാത്രം 700 താറാവ്, 1600 കോഴി എന്നിവയെ നശിപ്പിക്കേണ്ടതുണ്ടെന്നാണ് മൃഗസംരക്ഷണ വകുപ്പ് കണക്കാക്കുന്നത്. കോട്ടയം, ആലപ്പുഴ ജില്ലകളില് ഈ മാസം ആദ്യം രോഗം സ്ഥിരീകരിച്ചിരുന്നു. പതിനായിരക്കണക്കിന് പക്ഷികളെയാണ് പ്രദേശത്ത് നിന്നും നശിപ്പിച്ചത്.
ആലപ്പുഴയിലെ കുട്ടനാടന് മേഖലയിലും കോട്ടയത്ത് നീണ്ടൂരുമാണ് H-5 N-8എന്ന വൈറസ് രോഗം നേരത്തെ സ്ഥിരീകരിച്ചത്. പക്ഷിപ്പനി വീണ്ടും റിപ്പോര്ട്ട് ചെയ്ത സാഹചര്യത്തില് ജാഗ്രത നിര്ദേശം നല്കിയിട്ടുണ്ട്.