കൊച്ചി: നീണ്ടകാലത്തെ കാത്തിരിപ്പിനൊടുവില്‍ സംസ്ഥാനത്ത് കോവിഡ് വാക്സിന് എത്തുന്നു. ആദ്യഘട്ട കൊവിഡ്-19 വാക്സിന് ഇന്ന് കേരളത്തിലെത്തും. ആദ്യബാച്ചില്‍ 1,80,000 ഡോസ് വാക്സിനുകള്‍ ഉണ്ടാവും. ജില്ലാ കളക്ടറുടെ നേതൃത്വത്തിലുള്ള സംഘം വാക്സിന് ജില്ലാ സംഭരണ കേന്ദ്രങ്ങളിലേക്ക് മാറ്റും.
ഉച്ചക്ക് രണ്ടിന് വാക്സിനുമായുള്ള വിമാനം നെടുമ്പാശേരിയിലെത്തും. വൈകിട്ട് ആറിനാണ് തിരുവനന്തപുരത്തെത്തുക. നെടുമ്പാശ്ശേരി വിമാനത്താവളത്തില്‍ ഗോ എയറിനാണ് വാക്സിന് എത്തുന്നത്. ആദ്യബാച്ചില്‍ 25 ബോക്സുകളായിരിക്കും ഉണ്ടാവുക.
ഇതില്‍ 15 ബോക്സുകള്‍ എറണാകുളത്തേക്ക് പത്തു ബോക്സുകള്‍ കോഴിക്കോട്ടേക്കും ആണ് എത്തിക്കുക.. കോഴിക്കോട് നിന്ന് 1100 വാക്സിന് മാഹിയിലും വിതരണം ചെയ്യും. സംസ്ഥാനത്ത് സര്‍ക്കാര്‍ സ്വകാര്യ മേഖലയില്‍ ഇതുവരെ 3,62,870 പേരാണ് കോവിഡ് വാക്സിനേഷനായി രജിസ്റ്റര്‍ ചെയ്തത്.
കോവിഡ് മുന്‍നിര പോരാളികളായ ആരോഗ്യപ്രവര്‍ത്തകര്‍ അടക്കമുള്ളവര്‍ക്കാണ് ആദ്യ ഘട്ടത്തില്‍ വാക്സിന് നല്‍കുക. ഒരു കേന്ദ്രത്തില്‍ ഒരു ദിവസം 100 പേര്‍ക്ക് വാക്സിന് നല്‍കും. 133 കേന്ദ്രങ്ങളിലാണ് വാക്സിന് വിതരണം നടക്കുക. എറണാകുളം ജില്ലയില്‍ 12ഉം, തിരുവനന്തപുരം, കോഴിക്കോട് ജില്ലകളില്‍ 11ഉം, ബാക്കി ജില്ലകളില്‍ 9 കേന്ദ്രങ്ങള്‍ വീതമാണ് ഉണ്ടാകുക.
പഴുതടച്ച വാക്സിന് വിതരണത്തിനായി കര്‍മ്മ പദ്ധതിയും രൂപീകരിച്ചിട്ടുണ്ട്. എല്ലാ കേന്ദ്രങ്ങളിലും വെബ്കാസ്റ്റിംഗ് സംവിധാനങ്ങള്‍ ഏര്‍പ്പെടുത്തിയിട്ടുണ്ട്. വാക്‌സിനേഷന്‍ പ്രവര്‍ത്തനങ്ങളില്‍ പങ്കെടുക്കുന്ന ആരോഗ്യവകുപ്പ് ജീവനക്കാര്‍ക്കായി ഓണ്‍ലൈന്‍ വര്‍ക്ക്‌ഷോപ്പും സംഘടിപ്പിച്ചിരുന്നു.
