കൊച്ചി: കൊവിഡ് മഹാമാരിയെ തുടർന്ന് ജീവിതം പ്രതിസന്ധിയിലായവർ ഒരുപാടു പേരാണ്. അത്തരത്തിൽ ദുരിതം അനുഭവിക്കുന്ന കർഷകർക്ക് വേറിട്ട ഒരു സഹായമാണ് മാനസി നൽകുന്നത്. കർഷകരെ കണ്ടെത്തി അവരിൽ നിന്ന് ഉത്പന്നങ്ങൾ ശേഖരിച്ച് ഫാംഫുൾ എന്ന ഇൻസ്റ്റഗ്രാം പേജിലൂടെ വെർച്ച്വൽ മാർക്കറ്റ് രീതിയിൽ വിപണനം നടത്തുകയാണ് ഈ 23-കാരി.
കൃഷി ഓഫീസറായിരുന്ന അമ്മ എസ് രാജിയുടെ സഹായത്തോടെ കൃഷിക്കാരുടെ വിവരങ്ങൾ അറിഞ്ഞ് അവരെ സന്ദർഷിച്ച് ജൈവകൃഷിയുത്പന്നങ്ങൾ വാങ്ങി സൂക്ഷിച്ച് വെക്കുന്നു. തുടർന്ന് ആവശ്യകാർക്ക് മാനസിയും അനിയത്തി മീനാക്ഷിയും ചേർന്ന് എത്തിച്ചു കൊടുക്കുന്നു. പൈനാപ്പിൾ, ചേന, കുടംപുളി, പയർ തുടങ്ങിയവയാണ് ഇപ്പോൾ വിപണനം ചെയ്യുന്നത്.
പൂനെയിൽ ഇൻറ്റർനാഷണൽ ഓഫ് ബിസിനസ് ആൻഡ് മീഡിയയിൽ രണ്ടാം വർഷ എംബിഎ വിദ്യാർഥിനിയായ മാനസി കൊവിഡ് കാരണം കോളേജ് അടച്ചതോടെ വീട്ടിലെത്തിയതാണ്. മോഡലിങ്ങിൽ സജീവമായ മാനസി മറ്റെന്തെങ്കിലും കൂടി ചെയ്യണമെന്ന ചിന്തയിൽ നിന്നാണ് ഈ ആശയം വന്നത്. 2018ലെ ഗൃഹലക്ഷ്മി ഫെയ്സ് ഓഫ് കേരള സെക്കൻഡ് റണ്ണറപ്പായിരുന്ന മാനസി മിസ് കേരള 2020 മൽസരത്തിലും പങ്കെടുക്കുന്നുണ്ട്.
ജില്ലയുടെ വിവിധ ഭാഗങ്ങളിൽ നിന്നുള്ള കർഷകരുടെ സഹായത്തോടെയാണ് ഇപ്പോഴുള്ള വിപണന. കൂടാതെ ഇത് വികസിപ്പിക്കാനുള്ള ചർച്ചയും നടന്നു വരുന്നു. അതിനായി കർഷകർക്കായി ആഴ്ച്ചചന്ത പോലെ ഒരു സ്റ്റാൾ ഒരുക്കണമെന്നാണ് മാനസിയുടെ ഇപ്പോഴുള്ള ആഗ്രഹം.