കൊച്ചി: ജെസ്നയുടെ തിരോധാന കേസില് പുതിയ വെളിപ്പെടുത്തലുമായി സര്ക്കാര് ഹൈക്കോടതിയില്. ജെസ്നയുടെ വീട്ടില് നിന്നും പുതിയ സിംകാര്ഡ് കണ്ടെടുത്തതായി സര്ക്കാര് കോടതിയെ അറിയിച്ചു. വീട്ടിലെ ബൈബിളിനുള്ളില് നിന്നാണ് പുതിയ സിം കാര്ഡ് കണ്ടെടുത്തത്. ഇതില് നിന്നും കൂടുതല് വിവരങ്ങള് അന്വേഷണസംഘത്തിന് ലഭിച്ചിട്ടുണ്ട്. അതേസമയം നിലവിലെ അന്വേഷണത്തില് കോടതി സംതൃപ്തി രേഖപ്പെടുത്തി.
കേസ് മറ്റൊരു ഏജന്സിയെ കൊണ്ട് അന്വേഷിപ്പിക്കേണ്ടതില്ലെന്നും സര്ക്കാര് കോടതിയെ അറിയിച്ചു. സിബിഐ അന്വേഷണം ആവശ്യപ്പെട്ടുള്ള ഹര്ജി ഈ മാസം 17ന് വീണ്ടും കോടതി പരിഗണിക്കും.
ജെസ്ന തിരോധാനവുമായി ബന്ധപ്പെട്ട് ആണ്സുഹൃത്തിനെ അന്വേഷണ സംഘം 12 മണിക്കൂര് ചോദ്യം ചെയ്തിരുന്നു. ജെസ്നയുമായുള്ള അടുപ്പവും, ഇതില് ജെസ്നയുടെ കുടുംബത്തിന്റെ ഇടപെടല് സംബന്ധിച്ച വിവരങ്ങളും സുഹൃത്ത് അന്വേഷണ സംഘത്തോട് വെളിപ്പെടുത്തി. കുടുംബത്തിന്റെ ഇടപെടല് ജെസ്നയെ മാനസികമായി തളര്ത്തിയിരിക്കാമെന്ന് സുഹൃത്ത് അന്വേഷണസംഘത്തോട് പറഞ്ഞു.
എന്നാല് വീടുവിട്ടിറങ്ങിയ ജെസ്ന എവിടെപ്പോയെന്നോ എന്തുസംഭവിച്ചുവെന്നോ അറിയില്ലെന്നും പറയുന്നു. കേസ് അന്വേഷണവുമായി ബന്ധപ്പെട്ട് പോലീസിന് ഇപ്പോഴും വ്യക്തമായൊരുത്തരം ആയിട്ടില്ല. മുണ്ടക്കയത്തുനിന്ന് ലഭിച്ച ജെസ്നയോട് സാദൃശ്യമുള്ള സിസിടിവി ദൃശ്യങ്ങള്ക്കപ്പുറം പോകാന് കഴിയാത്തതും പോലീസിനെ പ്രതിസന്ധിയിലാക്കുന്നു. സംശയം തോന്നിയ നമ്പരുകള് ക്രോഡികരിച്ച് സൈബര് വിദഗ്ധരുടെ നേതൃത്വത്തിലുള്ള പരിശോധന പുരോഗമിക്കുകയാണ്.