തിരുവനന്തപുരം: പാമ്പുപിടിത്തം അവസാനിപ്പിക്കില്ലെന്ന് വാവ സുരേഷ്. ആളുകളുടെ അഭ്യര്‍ത്ഥനയെ തുടര്‍ന്നാണ് തീരുമാനം മാറ്റിയതെന്ന് സുരേഷ് പറഞ്ഞു. ആസൂത്രിതമായ സൈബര്‍ ആക്രമണത്തില്‍ മനംമടുത്ത് പാമ്പുപിടുത്തം നിര്‍ത്തുകയാണെന്ന് നേരത്തെ വാവ സുരേഷ് അറിയിച്ചിരുന്നു.
വ്യക്തിപരമായ അധിക്ഷേപത്തിന് പുറമേ പാമ്പിനെ പിടിക്കുന്ന രീതിക്കെതിരെയും പഴി കേട്ടതിനെ തുടര്‍ന്ന് പാമ്പ് പിടുത്തം അവസാനിപ്പിക്കുകയാണെന്ന് ആയിരുന്നു നേരത്തെ വാവ സുരേഷ് പറഞ്ഞത്. എന്നാല്‍ പാമ്പുപിടുത്തം നിര്‍ത്തുകയാണെന്ന തീരുമാനമറിഞ്ഞ് നിരവധി പേര് പാമ്പുപിടിത്തം നിര്‍ത്തരുതെന്ന് ആവശ്യപ്പെട്ടു. അതിനാലാണ് തീരുമാനം മാറ്റിയതെന്ന് വാവ സുരേഷ് വ്യക്തമാക്കി.
പോലീസിലും സൈബര്‍ സെല്ലിലും പല തവണ പരാതി നല്‍കിയിട്ടും ഇതുവരെ ഒരു നടപടിയും ഉണ്ടായില്ല. സാമൂഹിക മാധ്യമങ്ങളിലെ മോശം പരാമര്‍ശങ്ങള്‍ക്കെതിരെ നല്‍കിയ കേസുകളിലൊന്നും പോലീസ് നടപടിയെടുത്തില്ലെന്നും സുരേഷ് ആരോപിച്ചു.
29 വര്‍ഷമായി സംസ്ഥാനത്തിന്റെ വിവിധ ഭാഗങ്ങളില്‍ നിന്നായി 165 രാജവെമ്പാല ഉള്‍പ്പെടെ അമ്പത്തിരണ്ടായിരത്തോളം പാമ്പുകളെയാണ് വാവ സുരേഷ് രക്ഷിച്ചത്.
