കൊച്ചി: ലോക്സഭ തെരഞ്ഞെടുപ്പില് മത്സരിക്കാന് വേണ്ടി സരിത എസ് നായര് വയനാട്ടിലും എറണാകുളത്തും നല്കിയ നാമനിര്ദേശ പത്രികകള് തള്ളിയതിനെതിരെ പ്രതികരണവുമായി സരിത എസ് നായര്. തന്റെ പത്രിക തള്ളിയതിന് പിന്നില് രാഷ്ട്രീയമായ കളികള് നടന്നുവെന്ന് സരിത ആരോപിച്ചു.
പത്രിക തള്ളിയതിനെതിരെ അപ്പീല് നല്കും എന്ന് പറഞ്ഞ സരിത ഇന്ന് തന്നെ ഇതിനെതിരെ കേരള ഹൈക്കോടതിയില് റിട്ട് ഫയല് ചെയ്യും എന്നും വ്യക്തമാക്കി. പത്രിക തള്ളിയത് നല്ലതാണ് എന്നാണ് കരുതുന്നത് എനിക്കെതിരെ നടക്കുന്ന അനീതികളെ തുറന്നു കാണിക്കാന് ഒരു അവസരമാണ് അത് ഒരുക്കുന്നത് എന്ന് സരിത പ്രതികരിച്ചു.
തനിക്കെതിരെ ശിക്ഷകള് നിലവിലുണ്ട് എന്ന കാരണം പറഞ്ഞാണ് തന്റെ നാമനിര്ദേശ പത്രിക തള്ളിയത്. ശിക്ഷ റദ്ദാക്കിയിട്ടില്ലാത്തതിനാലാണ് നാമനിര്ദ്ദേശ പത്രിക തള്ളുന്നതെന്നാണ് വരണാധികാരി അറിയിച്ചത്. ശിക്ഷ റദ്ധാക്കി കൊണ്ടുള്ള ഉത്തരവ് ഹാജരാക്കാന് ഇന്ന് പത്തര വരെ സമയം അനുവദിച്ചിരുന്നു. ഇത് ഹാജരാക്കാന് കഴിയാത്തതിനാലാണ് പത്രിക തള്ളാന് തീരുമാനിച്ചത് എന്നാണ് പറയുന്നത്.
പക്ഷെ ഇതിന് വേണ്ട രേഖകള് എല്ലാം ഹാജരാക്കിയിട്ടും വരണാധികാരി പക്ഷപാതപരമായി പെരുമാറിയെന്ന് സരിത ആരോപിച്ചു. പല നേതാക്കന്മാരും മത്സരിക്കാന് ഹാജറാക്കിയ രേഖകള് തന്നെയാണ് താനും സമര്പ്പിച്ചത് എന്ന് സരിത എസ് നായര് പറയുന്നു.
സോളാര് കേസുമായി ബന്ധപ്പെട്ടാണ് സരിത രണ്ട് കേസുകളില് ശിക്ഷയനുഭവിച്ചത്.
നേരത്തെ സോളാര് തട്ടിപ്പുമായി ബന്ധപ്പെട്ട് രണ്ട് കേസില് സരിതയെ മൂന്നു വര്ഷം തടവിനു ശിക്ഷിച്ചിട്ടുണ്ട്. ഈ വിധി മേല്ക്കോടതി സ്റ്റേ ചെയ്തു കൊണ്ടുള്ള ഉത്തരവ് സരിത നാമനിര്ദേശ പത്രികയ്ക്കൊപ്പം ഹാജരാക്കിയിരുന്നില്ല. മൂന്നുവര്ഷം തടവിന് ശിക്ഷിക്കപ്പെട്ടാല് ജനപ്രാതിനിധ്യ നിയമമനുസരിച്ച് മത്സരിക്കാനാകില്ല.