ഇടുക്കി: തൊടുപുഴയില് അമ്മയുടെ സുഹൃത്ത് ക്രൂരമായി മര്ദ്ദിച്ച ഏഴ് വയസ്സുകാരന്റെ നിലയില് മാറ്റമില്ല. കഴിഞ്ഞ ദിവസം കുട്ടിയുടെ തലയ്ക്ക് ശസ്ത്രക്രിയ നടത്തിയെങ്കിലും ആരോഗ്യനിലയില് പുരോഗതിയുണ്ടായില്ല. അതീവ ഗുരുതരമായി തന്നെ തുടരുകയാണ്.
മര്ദ്ദനത്തില് തലയോട് പൊട്ടിയ കുട്ടിയുടെ ജീവന് വെന്റിലേറ്ററിന്റെ സഹായത്തോടെയാണ് നിലനിര്ത്തുന്നത്. ആന്തരിക രക്തസ്രാവം നിയന്ത്രിക്കാനാവുന്നില്ല. കുട്ടിയുടെ ശ്വാസകോശത്തിനും ഹൃദയത്തിനും വന്കുടലിനും തകരാറ് സംഭവിച്ചിട്ടുണ്ട്. പന്ത്രണ്ട് മണിക്കൂര് കൂടി വെന്റിലേറ്ററിന്റെ സഹായം തുടരും.
അതേസമയം, അറസ്റ്റിലായ പ്രതി അരുണ് ആനന്ദിനെ ഇന്ന് തൊടുപുഴ മജിസ്ട്രേറ്റ് കോടതിയില് ഹാജരാക്കും. വധ ശ്രമം ഉള്പ്പെടെയുള്ള കുറ്റങ്ങളാണ് ഇയാള്ക്കെതിരെ ചുമത്തിയിരിക്കുന്നത്.
അരുണ് കുട്ടിയെ അതിക്രൂരമായി മര്ദ്ദിച്ചെന്നും, ചവിട്ടിയും ഇടിച്ചും പരിക്കേല്പ്പിച്ചെന്നും പോലീസ് വ്യക്തമാക്കുന്നു. ചുവരിലേക്ക് വലിച്ചെറിഞ്ഞപ്പോഴാണ് കുട്ടിയ്ക്ക് ഗുരുതരമായി പരിക്കേറ്റത്. ഇളയകുട്ടി കിടക്കയില് മൂത്രമൊഴിച്ചതാണ് പ്രകോപനത്തിന് കാരണമെന്നും പോലീസ് പറയുന്നു.
കഴിഞ്ഞ ദിവസമാണ് തലയോട്ടി പൊട്ടിയ നിലയില് കുഞ്ഞിനെ അമ്മയും സുഹൃത്തായ അരുണ് ആനന്ദും ചേര്ന്ന് കോലഞ്ചേരിയിലെ സ്വകാര്യ ആശുപത്രിയില് കൊണ്ടുവരുന്നത്. രക്തത്തില് കുളിച്ച കുഞ്ഞിന്റെ തലച്ചോറ് പുറത്തു വന്ന നിലയിലായിരുന്നു. എന്താണ് സംഭവിച്ചതെന്ന് ഡോക്ടര്മാര് ചോദിച്ചപ്പോള് കുട്ടിയുടെ അമ്മ ആദ്യം സോഫയില് നിന്ന് വീണ് തല പൊട്ടിയെന്നാണ് പറഞ്ഞത്. എന്നാല്, കുട്ടിയെ പരിശോധിച്ച ഡോക്ടര്മാര്ക്ക് സംശയം തോന്നി. ബലമുള്ള എന്തോ വസ്തു വച്ച് തലയിലടിച്ച പോലെയായിരുന്നു കുട്ടിയുടെ പരിക്കുകള്.
കുട്ടിയുടെ പരിചരണത്തിനായിരുന്നു ആദ്യ പരിഗണന നല്കേണ്ടത് എന്നതിനാല് ആദ്യം ഡോക്ടര്മാര് കുഞ്ഞിന് അടിയന്തരശസ്ത്രക്രിയ നടത്തി. തുടര്ന്ന് പോലീസിനെ വിവരമറിയിച്ചു. പോലീസെത്തി കുട്ടിയുടെ അമ്മയുടെ സുഹൃത്തായ അരുണ് ആനന്ദിനോട് വിശദാംശങ്ങള് ചോദിച്ചു. എന്നാല് ചോദ്യം ചെയ്യലിനോട് സഹകരിക്കാനോ പോലീസ് നിര്ദേശിച്ചതു പോലെ ആംബുലന്സില് കയറാനോ ഇയാള് തയ്യാറായില്ല. അരുണ് ലഹരിയിലായിരുന്നു എന്നാണ് പോലീസ് നല്കുന്ന വിവരം.
എട്ട് മാസമായി അരുണ് ആനന്ദിനൊപ്പം താമസിക്കുകയായിരുന്നു ഈ യുവതിയും രണ്ട് കുട്ടികളും. കുട്ടികളുടെ അച്ഛന് ഒരു വര്ഷം മുമ്പ് മരിച്ചിരുന്നു. ഇതിന് ശേഷമാണ് അരുണിനൊപ്പം യുവതി തൊടുപുഴയില് വന്ന് താമസമാക്കിയത്.