കൊച്ചി: ജലന്ധര് ബിഷപ്പ് ഫ്രാങ്കോ മുളയ്ക്കലിനെതിരെ നടപടി സ്വീകരിക്കണമെന്നാവശ്യപ്പെട്ട് കന്യാസ്ത്രീകള് നടത്തുന്ന സമരം അഞ്ചാം ദിനം പിന്നിടുമ്പോള് മൗനം വെടിഞ്ഞ് കേരള കാത്തലിക് ബിഷപ്പ് കൗണ്സില് രംഗത്ത്. കന്യസാത്രീകള് നടത്തുന്ന സമരം അതിരുകടന്നതാണെന്നും അംഗീകരിക്കാന് സാധിക്കാത്തതാണെന്നും കേരള കാത്തലിക് ബിഷപ്പ് കൗണ്സില് കുറ്റപ്പെടുത്തി. അതോടൊപ്പം അന്വേഷണം വേഗത്തില് പൂര്ത്തിയാക്കി നീതി നടപ്പാക്കണമെന്നും കുറ്റവാളി ആരായാലും ശിക്ഷിക്കപ്പെടണമെന്നാണ് സഭയുടെ നിലപാടെന്നും കെസിബിസി കൂട്ടിച്ചേര്ത്തു.
ഇതിനിടെ രാഷ്ട്രീയ സാമൂഹിക മേഖലകളില് നിന്ന് കന്യാസ്ത്രീക്ക് ഐക്യദാര്ഢ്യം പ്രകടിപ്പിച്ച് നിരവധിയാളുകള് രംഗത്ത് വന്നിട്ടുണ്ട്. ബലാത്സംഗ ആരോപണം നേരിടുന്ന ബിഷപ്പ് ഫ്രാങ്കോ മുളയ്ക്കല് സ്ഥാനമൊഴിയണമെന്ന് മുംബൈ അതിരൂപത ആവശ്യപ്പെട്ടിരുന്നു. വിവാദം സഭയുടെ യശസിന് കളങ്കമുണ്ടാക്കിയതായും നിഷ്പക്ഷ അന്വേഷണത്തിന് പദവിയില് നിന്ന് മാറി നില്ക്കുന്നതാണ് ഉചിതമെന്നുമാണ് മുംബൈ അതിരൂപത അദ്ധ്യക്ഷന് പറഞ്ഞത്.