ന്യൂഡല്ഹി: മമതയോ മായാവതിയോ പ്രധാനമന്ത്രിയാവുന്നതില് വിയോജിപ്പില്ല, ലക്ഷ്യം ബിജെപിയെ താഴെയിറക്കലെന്ന് കോണ്ഗ്രസ് അധ്യക്ഷന് രാഹുല് ഗാന്ധി. പ്രതിപക്ഷത്തു നിന്ന് ആരേയും പിന്തുണയ്ക്കുമെന്നും രാഹുല് വ്യക്തമാക്കി.
ഞങ്ങള് എല്ലാ പ്രതിപക്ഷ കക്ഷികളെയും ഒരുമിച്ച് കൊണ്ടുവരും. ബിജെപിയെ പരാജയപ്പെടുത്താന് നമുക്ക് ഒരുമിക്കാം. ഇപ്പോള് പ്രധാനം അതാണ്. തെരഞ്ഞെടുപ്പിന് ശേഷം കാര്യങ്ങള് എങ്ങനെ മാറിമറിയുമെന്ന് നോക്കാം’ രാഹുല് പറഞ്ഞു.
ഉത്തര്പ്രദേശ്, ബീഹാര് പോലെ നിര്ണായകമായ സംസ്ഥാനങ്ങളില് പ്രതിപക്ഷവുമായി സഖ്യമുണ്ടാക്കിയാല് ബിജെപിക്ക് സര്ക്കാരുണ്ടാക്കാനോ നരേന്ദ്ര മോഡിക്ക് പ്രധാനമന്ത്രി ആകാനോ സാധിക്കില്ലെന്ന് വിലയിരുത്തുന്ന കോണ്ഗ്രസ് രാഹുല് ഗാന്ധിയെ പ്രധാനമന്ത്രി സ്ഥാനാര്ത്ഥിയാക്കണമെന്ന് കോണ്ഗ്രസ് കടുംപിടുത്തം നടത്തില്ലെന്നും പറയുന്നു.
മാന്യമായ സീറ്റുകളുടെ എണ്ണം ഉണ്ടെങ്കിലെ തെരഞ്ഞെടുപ്പ് സഖ്യത്തില് ഏര്പ്പെടാന് തങ്ങള് ഉള്ളുവെന്ന് നേരത്തെ ബിഎസ്പി നേതാവ് മായാവതി വ്യക്തമാക്കിയിരുന്നു. കഴിഞ്ഞ ദിവസത്തെ കോണ്ഗ്രസ് പ്രവര്ത്തക സമിതി യോഗത്തിന് ശേഷം പ്രതിപക്ഷ പാര്ട്ടികളുമായി സഖ്യമുണ്ടാക്കാനുള്ള ഉത്തരവാദിത്തം പാര്ട്ടി ഏല്പ്പിച്ചിരിക്കുന്നത് രാഹുലിനെ തന്നെയാണ്.