ന്യൂഡല്ഹി: സ്വകാര്യധനകാര്യസ്ഥാപനത്തില് പണം നിക്ഷേപിച്ച യുവരാജ് സിങ്ങിന്റെ മാതാവ് ഷബ്നം കൗറിന് 50 ലക്ഷം രൂപ നഷ്ടമായി. ഒരു കോടി രൂപ തട്ടിയെടുത്ത സ്ഥാപനത്തില് നിന്നും 50 ലക്ഷം രൂപ തിരികെ ലഭിച്ചതായി വിവരമുണ്ട്. ഷബ്നത്തിന് അടക്കം നിരവധി പേര്ക്ക് ഇത്തരത്തില് പണം നഷ്ടമായിട്ടുണ്ട്.
സംഭവത്തില് മുംബൈ എന്ഫോഴ്സ്മെന്റ് ഡയറക്ട്രേറ്റ് അന്വേഷണം ആരംഭിച്ചിട്ടുണ്ട്.
പണം നിക്ഷേപിച്ച രേഖകളും നിക്ഷേപിച്ചതിന്റെ ഉദ്ദേശവും വെളിപ്പെടുത്താന് എന്ഫോഴ്സ്മെന്റ് ആവശ്യപ്പെട്ടതായാണ് വിവരം. സാധന എന്ന്റെര്പ്രസസ് എന്ന കമ്പനിക്കെതിരെയാണ് അന്വേഷണം. പ്രതിവര്ഷം 84 ശതമാനം പണം തിരികെ ലഭിക്കുമെന്നാണ് ഷബ്നത്തിന് കമ്പനി വാഗ്ദാനം ചെയ്തത്. 50 ലക്ഷം തിരികെ ലഭിച്ചെങ്കിലും പിന്നീട് പണമൊന്നും ലഭിച്ചില്ല. തുടര്ന്നാണ് എന്ഫോഴ്സ്മെന്റിന് പരാതി നല്കിയത്.
നേരത്തേ ക്രിക്കറ്റ് താരം രാഹുല് ദ്രാവിഡിനും സമാനമായ രീതിയില് 15 കോടി രൂപ നഷ്ടപ്പെട്ടിട്ടുണ്ട്. ബംഗളൂരു ആസ്ഥാനമാക്കിയുളള നിക്ഷേപ കമ്പനിയായ വിക്രം ഇന്വസ്റ്റേഴ്സിന് എതിരെയാണ് താരം പരാതി നല്കിയത്. ദ്രാവിഡിനെ കൂടാതെ മറ്റ് ചില കായിക താരങ്ങളും ഈ കമ്പനിയുടെ തട്ടിപ്പിന് ഇരയായിട്ടുണ്ടെന്നാണ് വിവരം. എന്നാല് ദ്രാവിഡ് മാത്രമാണ് പരാതി നല്കിയിട്ടുളളത്.
കമ്പനിയുടെ മാനേജര്മാരില് ഒരാളായ സുത്രം സുരേഷ് ഇപ്പോള് ജുഡീഷ്യല് കസ്റ്റഡിയിലാണ്.