കൊച്ചി: നടന് ദിലീപിന്റെ ഫോണുകള് ഇന്ന് മുംബൈയില് നിന്ന് എത്തിക്കും. രണ്ട് ഫോണുകളാണ് ശാസ്ത്രീയ പരിശോധനയ്ക്കായി മുംബൈയിലുള്ളത്. നാല് ഫോണുകള് പരിശോധനയ്ക്ക് അയച്ചിട്ടില്ല. ആറു ഫോണുകള് മുദ്രവച്ച കവറില് ഹാജരാക്കാനാണ് കോടതി ഉത്തരവിട്ടത്.
തിങ്കളാഴ്ച രാവിലെ അഭിഭാഷകര് ഫോണ് കോടതിയില് ഹാജരാക്കും. നാല് ഫോണുകളില് രണ്ടെണ്ണം സഹോദരന് അനൂപിന്റെയും ഒന്ന് ബന്ധു അപ്പുവിന്റേതുമാണ്. ഈ ഫോണുകള് മുംബൈയിലേക്ക് അയച്ചിരുന്നില്ല. മുംബൈയിലുള്ള രണ്ട് ഫോണുകള് ഇന്ന് വൈകിട്ടോടെയാവും കേരളത്തിലെത്തിക്കുക.
also read: വിഷം കലര്ത്തിയ ജ്യൂസ് നല്കി മാനസിക വൈകല്യമുള്ള ഗര്ഭിണിയെ കൊലപ്പെടുത്തി, ഓട്ടോ ഡ്രൈവര് അറസ്റ്റില്
തിങ്കളാഴ്ച രാവിലെ 10.15നു മുന്പായി ഫോണുകള് കോടതിയിലെത്തിക്കണം. എവിടെയാണ് ഫോണുകള് പരിശോധന നടത്തേണ്ടതെന്ന് കോടതി തീരുമാനിക്കും. പരിശോധനാ റിപ്പോര്ട്ട് മാത്രമാകും അന്വേഷണ ഉദ്യോഗസ്ഥര്ക്ക് കൈമാറുക. ഫോണ് ഹാജരാക്കാന് കൂടുതല് സമയം വേണമെന്ന ദിലീപിന്റെ അപേക്ഷ ജസ്റ്റിസ് പി ഗോപിനാഥ് തള്ളുകയായിരുന്നു.
തിങ്കളാഴ്ച രാവിലെ 10.15ന് ഫോണ് ഹൈക്കോടതി രജിസ്ട്രിക്കു കൈമാറണം. ഇത് അനുസരിച്ചില്ലെങ്കില് ദിലീപിന് അറസ്റ്റില്നിന്നു നല്കിയ സംരക്ഷണം പിന്വലിക്കുമെന്ന് കോടതി മുന്നറിയിപ്പു നല്കി. അതിനിടയില്, ദിലീപിന്റെ മുന് ഭാര്യ മഞ്ജു വാര്യരില് നിന്നും അന്വേഷണ സംഘം ഫോണിലുടെ വിവരങ്ങള് തേടിയെന്നും സൂചനയുണ്ട്.
മുന് ഭാര്യയും അഭിഭാഷകരുമായുളള ഫോണ് സംഭാഷണങ്ങള് ഉളളതിനാല് ഫോണ് ഹാജരാക്കാനാകില്ലെന്നാണ് ദിലീപ് കഴിഞ്ഞ ദിവസം കോടതിയില് സ്വീകരിച്ച നിലപാട്. എന്നാല് അത്തരത്തില് സ്വകാര്യ സംഭാഷണങ്ങളൊന്നും നടന്നിട്ടില്ലെന്നും മകളുമായി ബന്ധപ്പെട്ട കാര്യങ്ങള് ഒന്നോ രണ്ടോ വട്ടം സംസാരിച്ചെന്നും മഞ്ജു വാരിയര് മറുപടി നല്കിയെന്നാണ് വിവരം.