കൊച്ചി: പ്രശസ്ത മലയാള സിനിമാനടന് റിസബാവ അന്തരിച്ചു. 54 വയസായിരുന്നു. കൊച്ചിയിലെ സ്വകാര്യ ആശുപത്രിയില് വെച്ചായിരുന്നു അന്ത്യം. നിര്മ്മാതാവും പ്രൊഡക്ഷന് കണ്ട്രോളറുമായ എന്എം ബാദുഷയാണ് ഇക്കാര്യം ഫേസ്ബുക്കിലൂടെ അറിയിച്ചത്.
സ്ട്രോക്കിനെ തുടര്ന്നാണ് അദ്ദേഹത്തെ ആശുപത്രിയില് പ്രവേശിപ്പിച്ചത്. ആരോഗ്യനില മോശമായതിനാല് വെന്റിലേറ്ററില് പ്രവേശിപ്പിച്ചിരിക്കുകയായിരുന്നു. ഇവിടെ ചികിത്സയില് കഴിയവെയാണ് മരിച്ചത്. നാടകത്തിലൂടെയാണ് റിസബാവ അഭിനയരംഗത്തേക്ക് കടന്ന് വരുന്നത്.
മലയാളത്തില് ഇതുവരെ 150 ഓളം സിനിമകളിലും ഇരുപതോളം സീരിയലുകളിലും അഭിനയിച്ചു. 1990-ല് റിലീസായ ഷാജി കൈലാസ് സംവിധാനം ചെയ്ത ഡോക്ടര് പശുപതിയാണ് താരത്തിന്റെ ആദ്യ സിനിമ. സിദ്ധിഖ്-ലാല് സംവിധാനം ചെയ്ത ഇന് ഹരിഹര് നഗറിലെ ജോണ് ഹോനായി എന്ന കഥാപാത്രത്തിലൂടെയാണ് റിസബാവ ശ്രദ്ധേയനാവുന്നത്.
ജോണ് ഹോനായിക്ക് ശേഷം മലയാള സിനിമയില് പ്രധാനപ്പെട്ട പല വില്ലന് റോളുകളും റിസബാവ അവതരിപ്പിച്ചിരുന്നു. സിനിമകള് കൂടാതെ ടെലിവിഷന് പരമ്പരകളിലും റിസബാവ സജീവമാണ്. വിവിധ ചാനലുകളിലായി നിരവധി സീരിയലുകളില് അഭിനയിച്ചു. അഭിനയം കൂടാതെ സിനിമകളില് ഡബ്ബിംഗും ചെയ്തു.