അസഭ്യം തേന്‍ പൂശി എടുത്ത് കാണിച്ചാല്‍ മധുരിക്കില്ല, ഫ്രീഡം അറ്റ് മിഡ്നൈറ്റ് വെറും കോപ്രായമെന്ന് രേവതി സമ്പത്ത്

സമൂഹമാധ്യമങ്ങളില്‍ ഇന്ന് ചര്‍ച്ചയായി മാറിയിരിക്കുന്നത് അനുപമ പരമേശ്വരന്‍ നായികയായി എത്തിയ ‘ഫ്രീഡം അറ്റ് മിഡ്‌നൈറ്റ്’ എന്ന ഹ്രസ്വചിത്രമാണ്. മൂന്നാമിടം, കെയര്‍ ഓഫ് സൈറ ഭാനു എന്നീ ചിത്രങ്ങളിലൂടെ ശ്രദ്ധേയനായ ആര്‍.ജെ. ഷാന്‍ ആണ് ചിത്രം തിരക്കഥയൊരുക്കി സംവിധാനം ചെയ്തിരിക്കുന്നത്.

ചിത്രം പുറത്തിറങ്ങിയതോടെ വിവാദങ്ങളും ഉയര്‍ന്നിരിക്കുകയാണ്. ചിത്രത്തിനെതിരെ ശബ്ദമുയര്‍ത്തി രംഗത്തെത്തിയിരിക്കുകയാണ് നടി രേവതി സമ്പത്ത്. ‘ഫ്രീഡം@മിഡ്നൈറ്റ് എന്നൊരു കോപ്രായം കണ്ടു. എന്തൊരു വിരോധാഭാസമാണ് ഇങ്ങനെ ആഘോഷമാക്കി മുഖ്യധാരയിലേക്ക് ഇറക്കുന്നത്.’ രേവതി പറഞ്ഞു. തന്റെ ഫേസ്ബുക്ക് പേജിലൂടെയാണ് രേവതി പ്രതികരണം അറിയിച്ചത്.

ആര്‍ജെ.ഷാനിനെ പോലുള്ളവര്‍ സമൂഹത്തിന് കലയിലൂടെ വീണ്ടും തെറ്റിദ്ധാരണകള്‍ ഉണ്ടാക്കികൊടുക്കുകയല്ല വേണ്ടതെന്ന് രേവതി പറയുന്നു. അസഭ്യം തേന്‍ പൂശി എടുത്ത് കാണിച്ചാല്‍ മധുരിക്കില്ല, അസഭ്യം,അസഭ്യം തന്നെയാണെന്നും രേവതി കൂട്ടിച്ചേര്‍ത്തു.

പോസ്റ്റ് ഇങ്ങനെ:

ഫ്രീഡം@മിഡ്നൈറ്റ് എന്നൊരു കോപ്രായം കണ്ടു. എന്തൊരു വിരോധാഭാസമാണ് ഇങ്ങനെ ആഘോഷമാക്കി മുഖ്യധാരയിലേക്ക് ഇറക്കുന്നത്. അല്ലെങ്കില്‍ തന്നെ സ്ത്രീകളെയും ഫെമിനിസത്തെയുമൊക്കെ ഇവിടെ അങ്ങേയറ്റം ഇന്‍സള്‍ട്ട് ചെയ്തുള്ള കൂമ്പാര കണക്കിന് സിനിമകള്‍ ചവറുപോലെ ഉണ്ട്. അതൊന്നും പോരാത്തതുകൊണ്ട് കുറെ സൂപ്പര്‍സ്റ്റാറുകളും അതുപോലെ സ്ത്രീവിരുദ്ധതയില്‍ phD എടുത്ത കുറെ തിരക്കഥാകൃത്തുക്കളും, സംവിധായകന്മാരും സംഭാവന ചെയ്ത സിനിമകള്‍ സമൂഹത്തിലെ ഓരോ മനുഷ്യരിലും പടര്‍ത്തിയ വിഷം ചെറുതൊന്നുമല്ല. നിരന്തരം തുറന്നുള്ള സംഭാഷണങ്ങളും ചര്‍ച്ചകളും പ്രവൃത്തികളും കലയുമൊക്കെ വഴിയാണ് മാറ്റങ്ങള്‍ കൊണ്ടുവന്നുകൊണ്ടിരിക്കുന്നത്.

സിനിമയില്‍ സംഭവിച്ചുകൊണ്ടിരിക്കുന്ന മാറ്റങ്ങള്‍, നാം കണ്‍മുമ്പില്‍ കണ്ടുകൊണ്ടിരിക്കുകയാണ്. വിവേചനങ്ങളും, വിരുദ്ധമായ രീതികളും ഇല്ലാത്ത ഒരു സിനിമ മേഖല എന്ന തരത്തിലേക്ക് മാറ്റങ്ങളുണ്ടാകുന്ന സമയമാണിത്. അതിന്റെ അളവ് കൂട്ടാന്‍ ഒരു പറ്റം മനുഷ്യര്‍ അഹോരാത്രം ശ്രമിച്ചുകൊണ്ടിരിക്കുമ്പോള്‍ ആര്‍ജെ.ഷാനിനെ പോലുള്ളവര്‍ സമൂഹത്തിന് കലയിലൂടെ വീണ്ടും തെറ്റിദ്ധാരണകള്‍ ഉണ്ടാക്കികൊടുക്കുകയല്ല വേണ്ടത്. അസഭ്യം തേന്‍ പൂശി എടുത്ത് കാണിച്ചാല്‍ മധുരിക്കില്ല, അസഭ്യം,അസഭ്യം തന്നെയാണ്.