വിദേശ വിപണികളില് ഹിറ്റായ ‘ജാസി’ന്റെ വൈദ്യുത പതിപ്പ് പുറത്തിറക്കാനുള്ള തയാറെടുപ്പിലാണു ഹോണ്ട. ഓരോ തവണ ചാര്ജ് ചെയ്യുമ്പോഴും 300 കിലോമീറ്റര് ഓടാന് വൈദ്യുത ‘ജാസി’നു കഴിയുമെന്നാണു പ്രതീക്ഷ. പോരെങ്കില് 18,000 ഡോളര്(ഏകദേശം 12.20 ലക്ഷം രൂപ) രൂപ വിലയ്ക്കാവും ഹോണ്ട ഈ ‘ജാസ്’ വില്പ്പനയ്ക്കെത്തിക്കുയെന്നാണു സൂചന; ഇതോടെ നിലവില് വിപണിലിയുള്ള വൈദ്യുത മോഡലുകളായ നിസ്സാന് ‘ലീഫ്’, ടെസ്ല ‘മോഡല് ത്രീ’ തുടങ്ങിയവയെ അപേക്ഷിച്ചു വളരെ കുറഞ്ഞ വിലയ്ക്കാണു ഹോണ്ട ‘ജാസി’നെ പടയ്ക്കിറക്കുന്നത്.
വൈദ്യുത കാറുകള്ക്കു മികച്ച വിപണന സാധ്യതയുള്ള ചൈനീസ് വിപണി ലക്ഷ്യമിട്ടാണു ഹോണ്ട ബാറ്ററിയില് ഓടുന്ന ‘ജാസ്’ അവതരിപ്പിക്കുന്നത്. അതുകൊണ്ടുതന്നെ ‘ജാസി’ന്റെ വൈദ്യുതീകരണത്തിനായി ചൈനയിലെ ഏറ്റവും വലിയ ബാറ്ററി നിര്മാതാക്കളായ കണ്ടംപററി ആംപെറെക്സ് ടെക്നോളജി(സി എ ടി എല്)യുമായി ഹോണ്ട ധാരണയിലെത്തിയിട്ടുമുണ്ട്.
ഇന്ത്യയെ പോലെ വൈദ്യുത കാറുകള്ക്കും ഇരുചക്രവാഹനങ്ങള്ക്കുമൊക്കെ മികച്ച പ്രോത്സാഹനമാണു ചൈനയും വാഗ്ദാനം ചെയ്യുന്നത്. ഇളവുകളും ആനുകൂല്യങ്ങളുമൊക്കെ ലഭ്യമാണെന്നതിനാല് ചൈനയ്ക്കു പിന്നാലെ ഈ ‘ജാസ്’ ഇന്ത്യയിലും വില്പ്പനയ്ക്കെത്താന് സാധ്യതയേറെയാണ്. അതേസമയം, നയത്തില് വ്യക്തതയില്ലെന്ന് ആരോപിച്ച് ഇന്ത്യയിലെ മോഡല് ശ്രേണി വൈദ്യുതീകരിക്കുന്നതു സംബന്ധിച്ചു ഹോണ്ട ഇതുവരെ തീരുമാനമെടുത്തിട്ടില്ല. ഒപ്പം തന്നെ സാഹചര്യം അനുകൂലമാവുന്ന പക്ഷം സങ്കര ഇന്ധന മോഡലുകളും വൈദ്യുത കാറുകളും വില്പ്പനയ്ക്കെത്തിക്കുമെന്നും കമ്പനി വ്യക്തമാക്കിയിട്ടുണ്ട്.
നിലവില് രണ്ട് എന്ജിന് സാധ്യതകളോടെയാണു ‘ജാസ്’ ഇന്ത്യയിലുള്ളത്: 87 ബി എച്ച് പി വരെ കരുത്തും 110 എന് എം വരെ ടോര്ക്കും സൃഷ്ടിക്കുന്ന 1.2 ലീറ്റര്, ഐ വി ടെക് പെട്രോള് എന്ജിനും 1.5 ലീറ്റര്, ഐ ഡി ടെക് ടര്ബോചാര്ജ്ഡ് ഡീസല് എന്ജിനും. 98.6 ബി എച്ച് പി വരെ കരുത്തും 200 എന് എം വരെ ടോര്ക്കുമാണ് ഡീസല് എന്ജിന് സൃഷ്ടിക്കുക. പെട്രോള് എന്ജിനൊപ്പം അഞ്ചു സ്പീഡ് മാനുവല്, സി വി ടി ഓട്ടമാറ്റിക് ഗീയര്ബോക്സുകളാണു ട്രാന്സ്മിഷന്. ഡീസല് എന്ജിനൊപ്പമാവട്ടെ ആരു സ്പീഡ് മാനുവല് ഗീയര്ബോക്സ് മാത്രമാണു ലഭിക്കുക.