തിരുവനന്തപുരം: ജലന്ധര് ബിഷപ്പിനെതിരായ ലൈംഗിക പീഡന പരാതി പിന്വലിക്കാന് സിസ്റ്റര് അനുപമയെ വിളിച്ച് 10 ഏക്കറും മഠവും നല്കാമെന്ന് വാഗ്ദാനങ്ങള് നല്കിയ വൈദികന് ജെയിംസ് എര്ത്തയിലിനെതിരെ സി എം ഐ സഭയുടെ നടപടി.
കുര്യനാട് ആശ്രമത്തിന്റെ ചുമതലയില്നിന്ന് എര്ത്തയിലിനെ മാറ്റി. സഭയുടെ ഇടുക്കിയിലെ സ്ഥാപനത്തിലേക്കാണ് എര്ത്തയിലിനെ മാറ്റിയിട്ടുള്ളത്. ആശ്രമത്തിന്റെ പ്രിയോര്, സ്കൂളുകളുടെ മാനേജര് എന്നീ പദവികളില്നിന്നും ഇദ്ദേഹത്തെ ഒഴിവാക്കിയിട്ടുണ്ട്. കൂടാതെ സംഭവത്തെ കുറിച്ച് വിശദീകരണം നല്കാനും സഭ എര്ത്തയിലിനോട് ആവശ്യപ്പെട്ടിട്ടുണ്ട്.
കഴിഞ്ഞദിവസമാണ് ഫാ. ജെയിംസ് സിസ്റ്റര് അനുപമയെ ഫോണില് വിളിച്ച് ബിഷപ്പിനെതിരായ കേസില്നിന്ന് പിന്മാറണമെന്ന് ആവശ്യപ്പെടുകയും വന്വാഗ്ദാനങ്ങള് നല്കുകയും ചെയ്തത്. 11 മിനുട്ടു നീണ്ടുനിന്ന സംഭാഷണം പുറത്തായതിനെ തുടര്ന്നാണ് സഭയുടെ നടപടിയെന്നാണ് സൂചന.
ബിഷപ്പിനെതിരായി ആരോപണമുന്നയിച്ച കന്യാസ്ത്രീയെ സഹായിച്ചയാളാണ് സിസ്റ്റര് അനുപമ. പത്തേക്കര് സ്ഥലവും മഠവുമായിരുന്നു സിസ്റ്റര് അനുപമയ്ക്ക് ജെയിംസ് എര്ത്തയില് വാഗ്ദാനം ചെയ്തത്. എന്നാല് വിഷയത്തില് മധ്യസ്ഥതയ്ക്ക് ആരെയും നിയോഗിച്ചിട്ടില്ലെന്നായിരുന്നു സംഭവത്തോടുള്ള ജലന്ധര് രൂപതാ സെക്രട്ടറിയുടെ പ്രതികരണം.