പ്രശസ്ത ബോളിവുഡ് ഗായിക കണിക കപൂറിന് കൊവിഡ്19 സ്ഥിരീകരിച്ചു. കണികക്ക് കൊവിഡ് സ്ഥിരീകരിച്ചതിനു പിന്നാലെ നിരവധി പേരാണ് ഇപ്പോൾ ആശങ്കയിലായിരിക്കുന്നത്. കുറച്ചു നാളുകളായി ലണ്ടനിൽ താമസിച്ചിരുന്ന കണിക മാർച്ച് 15 നാണ് നാട്ടിലെത്തിയത്.
എന്നാൽ രാജ്യത്ത് കൊവിഡ് സ്ഥിരീകരിച്ച സാഹചര്യത്തിൽ തന്റെ വിദേശ യാത്രയുടെ വിവരങ്ങൾ അധികൃതരെയോ അറിയിക്കുകയോ സ്വയം ഐസൊലേഷനിൽ കഴിയുകയോ ചെയ്തില്ലെന്നാണ് റിപ്പോർട്ടുകൾ. മാത്രവുമല്ല നാട്ടിൽ തിരിച്ചെത്തിയ ശേഷം മൂന്ന് 5 സ്റ്റാർ പാർട്ടികളാണ് ഇവർ നടത്തിയത്. ഈ പാർട്ടികളിൽ രാജ്യത്തെ രാഷ്ട്രീയനേതാക്കൾ ഉൾപ്പെടെ നിരവധി പ്രമുഖരാണ് പങ്കെടുത്തത്.
കണികയുടെ അച്ഛൻ രാജീവ് കപൂർ ആണ് ആജ് തക് ന്യൂസിന് ലണ്ടനിൽ നിന്ന് തിരിച്ചെത്തിയ ശേഷം കണിക ഉത്തർപ്രദേശിൽ നടത്തിയ പാർട്ടികളുടെ വിവരങ്ങൾ നൽകിയിരിക്കുന്നത്. 400 ഓളം പേരാണ് ഇവരുടെ പാർട്ടികളിൽ പങ്കെടുത്തത്. കണികക്ക് കൊവിഡ് സ്ഥിരീകരിച്ച സാഹചപര്യത്തിൽ ഇവരുടെ കുടുംബാംഗങ്ങളും നിരീക്ഷണത്തിലാണ്.
എന്നാൽ കണിക എയർപോർട്ടിൽ വൈറസ് ടെസ്റ്റിന് വിധേയമായിരുന്നെന്നും റിസൽട്ട് നെഗറ്റീവ് ആയിരുന്നെന്നുമാണ് ഇവരുടെ അച്ഛൻ പറയുന്നത്. ലക്നൗവിലെ കിംഗ് ജോർജ് മെഡിക്കൽ ആശുപത്രിയിൽ ചികിത്സയിലാണ് കണിക ഇപ്പോൾ.