കോട്ടയം: കുരുമുളക് പൊടിയാണെന്ന് കരുതി എലിവിഷം ചേര്ത്ത് മീന് വറുത്തു കഴിച്ച ദമ്പതികള് ആശുപത്രിയില്. മീനച്ചില് വട്ടക്കുന്നേല് ജസ്റ്റിന് (22), ഭാര്യ ശാലിനി (22) എന്നിവരാണ് മെഡിക്കല് കോളേജ് ആശുപത്രിയില് ചികിത്സയിലുള്ളത്.
കഴിഞ്ഞ ദിവസം രാത്രിയാണ് സംഭവം. മീന് വറുത്തു കൊണ്ടിരിക്കുന്നതിനിടയില് വൈദ്യുതി ബന്ധം തകരാറിലായിരുന്നു. ഈ സമയം കുരുമുളക് പൊടിയാണെന്ന് കരുതി അടുക്കളയില് സൂക്ഷിച്ചിരുന്ന എലിവിഷം മീന് വറുത്തുകൊണ്ടിരുന്ന പാത്രത്തിലേക്ക് ഇടുകയായിരുന്നുവെന്ന് ദമ്പതികള് പറഞ്ഞു.
മീന് വറുത്തത് കഴിച്ച് അല്പനേരം കഴിഞ്ഞപ്പോള് ഇരുവര്ക്കും ഛര്ദ്ദി ഉണ്ടായി. തുടര്ന്ന് അടുക്കളയിലെത്തി പരിശോധിക്കുകയായിരുന്നു. അപ്പോള് മാത്രമാണ് കുരുമുളകുപൊടിക്കു പകരം എലിവിഷമാണ് ചേര്ത്തതെന്ന് ഇവര്ക്ക് മനസ്സിലായത്.
ഉടന് തന്നെ പാലാ താലൂക്ക് ആശുപത്രിയിലും തുടര്ന്ന് മെഡിക്കല് കോളജിലും എത്തിക്കുകയായിരുന്നു. ഇവര്ക്ക് ഏഴു മാസം പ്രായമായ കുട്ടിയുണ്ട്. എന്നാല് കുട്ടി മീന് വറുത്തത് കഴിച്ചില്ല. ഇരുവരുടേയും ആരോഗ്യനില മെച്ചപ്പെട്ടെന്ന് ഡോക്ടര്മാര് അറിയിച്ചു.