നീണ്ട പത്ത് വര്ഷത്തെ പ്രണയത്തിനൊടുവിലാണ് ആരാധകരുടെ പ്രിയതാരം ടൊവീനോ തോമസ് ലിഡിയയുടെ കഴുത്തില് മിന്നുകെട്ടുന്നത്. പ്ലസ് വണ്ണില് തുടങ്ങിയ ഇരുവരുടെയും പ്രണയകഥ ഇപ്പോള് ആരാധകരുമായി പങ്കുവച്ചിരിക്കുകയാണ് നടന് ടൊവീനോ തോമസ്. ലിഡിയയെ കണ്ടുമുട്ടിയതും ഇരുവരും പ്രണയത്തിലായ കഥയും വ്യക്തമാക്കികൊണ്ടുള്ള ടൊവിനോയുടെ പ്രണയത്തിന്റെ ഓര്മ്മക്കുറിപ്പ് ഇപ്പോള് വൈറലായി കൊണ്ടിരിക്കുകയാണ്.
പ്ലസ് വണ്ണിലെ മലയാളം ക്ലാസില് അക്ഷരമാല എഴുതാന് പറഞ്ഞപ്പോള് തുടങ്ങിയതാണ് ലിഡിയയോടുള്ള പ്രണയമെന്ന് ടൊവിനോ പറയുന്നു. ഏറെ പിന്നാലെ നടന്നതിനു ശേഷമാണ് തനിക്ക് പോസിറ്റീവ് ആയ മറുപടി ലഭിച്ചതെന്നും ആദ്യത്തെ പ്രണയ സമ്മാനം 15 രൂപയുടെ ബ്രേസ്ലെറ്റ് ആയിരുന്നു എന്നും ടൊവിനോ പറയുന്നു.
‘ 2004 ലാണ് കഥയുടെ തുടക്കം. പ്ലസ് വണ്ണിലെ മലയാളം ക്ലാസ്സ് ടീച്ചര് വന്ന് അക്ഷരമാല കാണാതെ എഴുതാന് പറയുന്നു. പ്ലിങ് ‘ക ഖ ഗ ഘ ങ’ വരെ ഒകെ. പിന്നെ അങ്ങോട്ട് അവിടെയും ഇവിടെയും കുറച്ച് ലെറ്റേഴ്സ് മിസ്സിങ്. തൊട്ട് മുന്നിലിരിക്കുന്ന പെണ്കൊച്ച് ശടപേട പറഞ്ഞ് എല്ലാം എഴുതിയിട്ട് ഇരിക്കുന്നു. അതാണ് കഥാനായിക ലിഡിയ. അന്ന് നോട്ട് വാങ്ങി മാനം രക്ഷപ്പെടുത്താന് തുടങ്ങിയ പുറകെ നടപ്പ് പിന്നെ അങ്ങ് തുടര്ന്നു.
മുട്ടി മുട്ടി ഒരു പരുവമായപ്പോള് അവള് ആ വാതിലങ്ങ് തുറന്നു. കത്തെഴുതി പ്രണയിച്ച ചുരുക്കം ചിലരാണ് ഞങ്ങളും. കഥയും കവിതയും സകലമാന പൈങ്കിളിയും നിറച്ച കത്തുകള്. സകല കാമുകന്മാരെ പോലെയും എത്രയോ ജന്മമായി ഒക്കെ പാടി അലമ്പാക്കി കൊടുത്താലേ സമാധാനമാകൂ.
പ്രണയം വീട്ടിലറിഞ്ഞു. 2014 ഒക്ടോബര് 25 ന് ഞാനവളെ മിന്നു കെട്ടി. എന്നാലും ഇതുവരെയും പഴയ കത്ത് കാണിച്ച് മിഥുനത്തിലെ ഉര്വ്വശി ചേച്ചിയുടെ കഥാപാത്രമാകാന് അവള് നോക്കീട്ടില്ല.. ആദ്യത്തെ പ്രണയ സമ്മാനം 15 രൂപയുടെ ബ്രേസ്ലെറ്റ് ആയിരുന്നു. ഞങ്ങള്ക്ക് ഒരു മകളുണ്ടായി ഇസ എന്നാണ് പേരിട്ടിരിക്കുന്നത്.’ ടൊവീനോ പറഞ്ഞു.