മദ്രാസ്: രാജീവ് ഗാന്ധി വധക്കേസ് പ്രതി നളിനി ശ്രീഹരന് ഒരു മാസത്തെ പരോള് അനുവദിച്ചു. ഇവര് 27 വര്ഷമായി ജയിലില് കഴിയുകയാണ്. പരോള് അനുവദിക്കണമെന്ന ഹര്ജിയില് നേരിട്ട് ഹാജരായി വാദിക്കാന് മദ്രാസ് ഹൈക്കോടതി നളിനിക്ക് അനുമതി നല്കിയിരുന്നു.
ഇന്ത്യന് പ്രധാനമന്ത്രിയായിരുന്ന രാജീവ് ഗാന്ധിയെ 1991 മേയ് 21 ന് ചാവേര് സ്ഫോടനത്തിലൂടെ വധിച്ച കേസില് ജീവപര്യന്തം ജയിലിലുള്ള ഏഴ് പ്രതികളിലൊരാളാണ് നളിനി. ഇരുപത്തിയേഴ് കൊല്ലത്തിനിടെ 2016 ല് പിതാവ് മരിച്ചതിനെ തുടര്ന്ന് നളിനിക്ക് പരോള് അനുവദിച്ചിരുന്നു. അതിനു ശേഷം മകള് അരിത്രയുടെ വിവാഹത്തില് പങ്കെടുക്കാന് നളിനി പരോള് ആവശ്യപ്പെട്ട് കോടതിയെ സമീപിച്ചിരുന്നു.
ജീവപര്യന്തം തടവനുഭവിക്കുന്നവര്ക്ക് രണ്ടുവര്ഷം കൂടുമ്പോള് ഒരു മാസത്തെ പരോളിന് അവകാശമുണ്ട്. എന്നാല്, 27 വര്ഷമായി പരോള് ലഭിച്ചിട്ടില്ലെന്നായിരുന്നു നളിനിയുടെ പരാതി. ജയില് സൂപ്രണ്ടിന് നല്കിയ അപേക്ഷയില് തീരുമാനമാകാത്തതിനെ തുടര്ന്നാണ് നളിനി മദ്രാസ് ഹൈക്കോടതിയെ സമീപിച്ചത്. മുന്കരുതല് നടപടിയായി മദ്രാസ് ഹൈക്കോടതിയുടെ പരിസരത്ത് കനത്ത സുരക്ഷയാണ് ഒരുക്കിയിരുന്നത്.
അറസ്റ്റിലായത് മുതല് 27 വര്ഷമായി വെല്ലൂര് സെന്ട്രല് ജയിലിലാണ് നളിനി. ജസ്റ്റിസുമാരായ എംഎം സുന്ദരേശ്, എം നിര്മല് കുമാര് എന്നിവരടങ്ങിയ ഡിവിഷന് ബെഞ്ചാണ് നളിനിയുടെ ആവശ്യം അംഗീകരിച്ചത്. നളിനിയുടെ ആവശ്യം നിഷേധിക്കാന് കഴിയില്ലെന്ന് കോടതി നേരത്തെ നിരീക്ഷിച്ചിരുന്നു.
അതേസമയം, നളിനിയുടെ വധശിക്ഷ സോണിയ ഗാന്ധിയുടെ അപേക്ഷ പ്രകാരം 2000ല് തമിഴ്നാട് സര്ക്കാര് ജീവപര്യന്തമായി കുറച്ചിരുന്നു.