തിരുവനന്തപുരം: കാസര്കോട് മണ്ഡലത്തില് തെരഞ്ഞെടുപ്പില് കള്ളവോട്ട് നടന്നതിനെ കുറിച്ചുള്ള ജില്ലാ കളക്ടര് മിര് മുഹമ്മദ് അലിയുടെ റിപ്പോര്ട്ട് കേന്ദ്ര തെരഞ്ഞെടുപ്പ് കമ്മീഷന്റെ പരിഗണനയ്ക്കു വിടും. ഇന്നു തന്നെ മുഖ്യ തെരഞ്ഞെടുപ്പ് ഓഫീസര് ടീക്കാറാം മീണ റിപ്പോര്ട്ട് കേന്ദ്ര തെരഞ്ഞെടുപ്പു കമ്മീഷനു കൈമാറുമെന്നാണ് സൂചന. വിഷയത്തിലെ തുടര്നടപടികള് കേന്ദ്ര തെരഞ്ഞെടുപ്പു കമ്മീഷന് തീരുമാനിക്കും.
കള്ളവോട്ട് നടക്കുന്നതിന്റെ ദൃശ്യങ്ങള് പുറത്തു വന്നതിനു പിന്നാലെ വിഷയത്തെ കുറിച്ച് കാസര്കോട്ടെയും കണ്ണൂരിലെയും കളക്ടര്മാരോട് മുഖ്യ തെരഞ്ഞെടുപ്പ് ഓഫീസര് റിപ്പോര്ട്ട് ആവശ്യപ്പെട്ടിരുന്നു. കളക്ടര് റിപ്പോര്ട്ട് മുഖ്യതെരഞ്ഞെടുപ്പ് കമ്മീഷണര്ക്ക് കൈമാറിയിട്ടുള്ളത് പ്രിസൈഡിങ് ഓഫീസറെയും വെബ് ക്യാമറയുടെ ചുമതലയുണ്ടായിരുന്ന ഉദ്യോഗസ്ഥനെയും ബൂത്ത് തലത്തില് ചുമതലയുണ്ടായിരുന്ന ഉദ്യോഗസ്ഥരെയും നേരിട്ട് വിളിച്ചതിനു ശേഷമാണ്.
വെബ് ക്യാമറയുടെ ചുമതലയുള്ള ഉദ്യോഗസ്ഥന് കള്ളവോട്ട് നടന്നുവെന്ന് കളക്ടറെ അറിയിച്ചുവെന്നാണ് ലഭിക്കുന്ന വിവരം. മുഖ്യ തെരഞ്ഞെടുപ്പ് ഓഫീസര് എന്തെങ്കിലും ശുപാര്ശകള്ക്കൊപ്പമാണോ റിപ്പോര്ട്ട് കേന്ദ്ര തെരഞ്ഞെടുപ്പ് കമ്മീഷന് സമര്പ്പിക്കുക എന്ന കാര്യം വ്യക്തമല്ല.